Ինչքան էլ համակրենք ուկրաինացիներին, չպետք է մոռանանք Ադրբեջանին սատարելու փաստը․ Սոսի Թաթիկյան (տեսանյութ)
Աջակցիր «Ա1+»-ինՀայաստանի հանրապետության արտգործնախարարության նախնական դիրքորոշումը միակ հնարավոր ողջամիտ դիրքորոշումն էր, որն այս իրավիճակում հնարավոր է։
Միջազգային հարաբերությունների ու անվտանգության փորձագետ Սոսի Թաթիկյանը այսպես գնահատեց ԱԳՆ-ի արձագանքը։
Նրա խոսքով՝ տարբեր կողմերից Հայաստանի հանրապետության վրա կարող են լինել ճնշումներ և շատ կարևոր է, որ Հայաստանը կարողանա առաջնորդվել սառը դատողությամբ։
Թաթիկյանի կարծիքով Հայաստանը պետք է հնարավորին չափ նվազեցնի վտանգները, քանի որ այս իրավիճակում նրա համոզմամբ տուժելու են բոլոր ներգրավված պետությունները և կազմակերպությունները։
«Տեղի է ունենում աշխարհաքաղաքական շահերի և արժեհամակարգերի մեծ բախում։ Տվյալ պարագայում ինչքան քիչ Հայաստանի Հանրապետությունը դիրքորոշումներ հայտնի, այնքան ճիշտ կլինի»,- ասում է նա։
Սոսի Թաթիկյանի դիտարկմամբ, եթե Հայաստանը այս հարցում սատարի Ռուսաստանին, ապա մեզ սպասվում է քաղաքական մեկուսացումն Արևմուտքի կողմից։ Ուկրաինային սատարելու դեպքում էլ մենք խնդիրներ ենք ունենալու անվտանգության ոլորտում։
«Մենք հիմա պետք է կենտրոնանանք հենց մեր սահմանների պաշտպանության վրա, քանի որ միջազգային հանրության ուշադրությունը շեղվել է այս տարածաշրջանից, այդ թվում առաջին հերթին Ռուսաստանի ուշադրությունը։
Ես վստահ եմ, որ Ադրբեջանը դրանից կփորձի օգտվել թե՛ մեր սահմանների շրջանում, թե՛ նաև Արցախում» նկատում է Թաթիկյանը։
Նրա խոքով՝ պետք է հասկանալ, թե ինչպես կարելի է նվազեցնել հնարավոր ռիսկերը Արցախում։
Հաջորդ խնդիրը, ըստ Սոսի Թաթիկյանի, Արցախի հակամարտությունը Դոնբասի հակամարտության հետ ասոցացնելն է։
Նրա խոսքով՝ դրանք տարբեր բաներ են և այն չպետք է ընկալվի որպես անջատողական շարժում։
«Իհարկե, մենք չպետք է մոռանանք նաև, որ Ուկրաինան Ադրբեջանին բավականին աջակցում էր պատերազմի ժամանակ։ Ինչքան էլ, որ Հայաստանում, որոշ շրջանակներ համակրանք ունենան ուկրաինական ժողովրդի հանդեպ, մենք չենք կարող մոռանալ այդ փաստը,-գտնում է Թաթիկյանը
