Հաջորդ գործողությունը կլինի այն, որ ժողովուրդն իր բողոքի ձայնը կբարձրացնի․ Փարաքարում «Ապրելու երկիր» խմբակցության համայնքի ղեկավարի թեկնածու

Բախումներից խուսափելու համար Փարաքար համայնքի «Ապրելու երկիր» խմբակցության ավագանու անդամները վայր դրեցին մանդատները։

«Ա1+»-ի հետ զրույցի ժամանակ ասաց Փարաքարում «Ապրելու երկիր» խմբակցության կողմից համայնքի ղեկավարի թեկնածու Վալոդյա Գրիգորյանը՝ պարզաբանելով՝ ինչու վայր դրեցին ավագանու անդամները իրենց մանդատները։

Հիշեցնենք՝ «Ապրելու երկիր» կուսակցությունը Փարաքար համայնքում հավաքել է  49% ձայն։

«Այդ պահին համերաշխության ֆոն էր պետք ստեղծել։ Մենք բոլորին հորդորել էինք օրենքը պահել, բայց մենք ականատես էինք լինում, որ օրենքը չի պահպանվում և հանրային գործողություններ են կատարվում և միանշանակ տարաձայնություններ էին լինելու, հավաքվելու էին համայնքի բնակիչները և ուրիշ բան էր ստացվելու, որը ոչ մեկիս պետք չէր»,-ասաց Գրիգորյանը։

Համայնքապետի թեկնածուն նշեց, որ «Ապրելու երկիր» խմբակցությունը, 03․01․2022թ․ դիմել է ՀՀ կառավարությանը Փարաքար համայնքի ավագանու լիազորությունները վաղաժամկետ դադարեցնելու և նոր ընտրություններ նշանակելու խնդրանքով, բայց մինչև այս պահը նորություն չունեն։

«Օրենքում հստակ գրված է՝ երկշաբաթյա ընթացքում, եթե չի ձևավորվում համայնքի ղեկավար պաշտոնը, ապա տվյալ համայնքում պետք է անցկացվեն ավագանու նոր ընտրություններ։ Ժամկետը լրացել է հունվարի 3-ին։ Ավագանու նիստ չի կայացել, հունվարի 5-ին կրկին դիմել եմ Կառավարությանը, հունվարի 7-ին նույնպես նիստ չի եղել և միայն 19-րդ օրն է տեղի ունեցել ավագանու նիստ»,- ասաց Վալոդյա Գրիգորյանը նշելով՝ ստացվում է, որ Կառավարությունն էլ է սատար կանգնում այս անօրենությանը։

«Եթե կառավարությունից արձագանք չլինի հաջորդ գործողությունը կլինի այն, որ ժողովուրդն իր բողոքի ձայնը կբարձրացնի Կառավարության դիմաց»․- եզրափակելով խոսքը ասաց Փարաքարում «Ապրելու երկիր» խմբակցության կողմից համայնքի ղեկավարի թեկնածու Վոլոդյա Գրիգորյանը։

Նշենք՝ այսօր «Ապրելու երկիր» կուսակցությունը հայտարարություն էր տարածել, որտեղ ասվում էր՝ «Ապրելու երկիր» խմբակցությունը դիմելու է դատարան՝ կառավարության անգործության հիմքով և կառավարության կողմից իր պարտականությունների կատարման պահանջով։