Այս մարդիկ ապիկար են, իրենք ընդամենը կատարել են Ռուսաստանի կենտրոնի հրահանգները․ Վարուժան Ավետիսյան (տեսանյութ)
Աջակցիր «Ա1+»-ինԱյսօր հրավիրած մամուլի ասուլիսում «Ազգային ժողովրդական բևեռ» կուսակցության խորհրդի անդամ Վարուժան Ավետիսյանն անդրադարձավ պատերազմի պարտության ռազմական և քաղաքական պատճառներին։ Նա մասնավորապես նշեց, որ ամեն ինչ պայմանավորված է եղել քաղաքական -ռազմավարական պատճառներով, թեպետ, նրա խոսքով, սարսափելի ձախողումներ ենք ունեցել բոլոր մակարդակներում։
«2018 թվականի «չհեղափոխությունից» հետո, երբ հնարավոր եղավ ստեղծել ժողովրդի մոլորվածության բացարձակ մի վիճակ, գաղութային ադմինիստրացիան ազատեց իր ձեռքերը և պայմանավորված պատերազմը սպասարկելով՝ մեզ բերեց հասցրեց այս աղետի շեմին»,- նշեց Վարուժամ Ավետիսյանը։
Նա նկատեց․ «Այդ հակապետական կառավարման համակարգն ամբողջությամբ իմիտացիոն է։ Այն, ինչ անում է նա որպես դրական, իրականում իմիտացիա է, արվում է նվազագույնը՝ զուտ վարչական ադմինիստրատիվ կառավարման պահանջների չափով և տրամաբանությամբ։ Նրա խորքային առաքելությունը հայոց պետականության վերացումն է և դրանով էլ զբաղված է այս համակարգը»։
Վարուժան Ավետիսյանը համոզմունք հայտնեց, որ Ռուսաստանի կողմից տեղի է ունեցել պարտության արդյունավետ վերահսկողություն։
«Ամբողջությամբ ստանձնելով հակապետական կառավարության անմիջական վերահսկողությունը, Ռուսաստանը սկսեց վերահսկել պատերազմի կառավարումը՝ սահմանափակումներ մտցնելով զենք-զինամթերք տալու առումով, համապատասխան թիրախներին խոցել-չխոցելու առումով, տարատեսակ խոչընդոտներ ստեղծել նաև ուրիշներից օգնություն ստանալու առումով»,- նշեց նա ՝ հավելելով, որ Ռուսաստանը լայնորեն աջակցել է մեր թշնամիներին՝ տալով մեր վերաբերյալ համապատասխան տեղեկություններ։
Ինչ վերաբերում է պատերազմի կառավարմանը, բանախոսը նշեց, որ ինչքան էլ կազմակերպված է եղել պատերազմի պարտությունը, հակապետական կառավարման համակարգը նաև ինքնին ամուլ էր․ «Քաղաքական կառավարման մասին էլ չխոսենք, բացարձակապես այս մարդիկ ապիկար են, իրենք ընդամենը կատարել են Ռուսաստանի կենտրոնի հրահանգները»,-նշեց Վարուժան Ավետիսյանը։
