Հաղթեց հայերին, պարտվեց` չեչենին
Հայաստանի ձյուդոիստ, 60 կգ քաշային Գոռ Հարությունյանին չհաջողվեց մեդալ նվաճել աշխարհի երիտասարդական առաջնությունում, որը այսօր մեկնարկեց Մարոկոյում:
Մեր մարզիկը առաջին մրցամարտում հաղթեց Ուկրաինան ներկայացնող հայազգի ձյուդոիստ Գեւորգ Խաչատրյանին, ապա Բելառուսի թիմից հանդես եկող իր հայրենակից Վահե Թութխալյանին: Երրորդ փուլում Գոռը պայքարից դուրս բերեց արդեն ադրբեջանցի Միրզա Ասգարովին, սակայն հաջորդ գոտեմարտում պարտվեց ձյուդոի հայրենիքի ներկայացուցիչ Տորե Շիշիմեին: 3-րդ տեղի համար պայքարում մեր երիտասարդ մարզիկը սկզբում հաղթեց իրանցի Ղասեմ Նուրիզադեին, բայց վճռական մրցամարտում զիջեց Ռուսաստանի ներկայացուցիչ, չեչեն ձյուդոիստ Յակուբ Շամիլովին:
Մեր երկրորդ մասնակից, 55 կգ քաշային Գրիգոր Իվանյանը, չնայած հաղթահարեց առաջին փուլը, սակայն երկրորդում պարտվեց իտալացի Ֆաբիո Բասիլեին եւ ժամանակից շուտ դուրս մնաց պայքարից:
