Այսօր մանակական քաղցկեղի դեմ պայքարի միջազգային օրն է։ ՀՀ-ում այն նշվում է 2002 թվականից։

Պրոֆեսոր, Ռ․ Հ․ Յոլյանի անվան Արյունաբանական կենտրոնի տնօրեն Սամվել Դանիելյանի խոսքով՝  եթե մենք 90-ականների կեսերից և վերջերից ունենում էինք 3-5 տոկոս առողջացում, ապա այսօր Հայաստանում տասը երեխայից 7-ը, երբեմն 8-ը լիարժեք առողջանալու հնարավորություն ունի․

«Հայ երեխան, ով հիվանդանում է Կապանում կամ Մեղրիում, այսօր հնարավորություն ունի ստանալու նույն բուժումը, ինչ Լոնդոնում։ Իհարկե արդյունքների առումով մենք դեռ զիջում ենք Արևմուտքին, բայց ամեն տարի զիջման տարածությունները կրճատվում են։ Դեռ կան խնդիրներ, որոնք պարտավոր ենք և պիտի հաղթահարենք»,-ասում է Սամվել Դանիելյանը։

Ըստ Առողջապահության համաշխարհային կազմակերպության՝ քաղցկեղով հիվանդ երեխաների 80 տոկոսն առողջանում են բարձր եկամուտ ունեցող երկրներում։

Հայաստանի մանակական քաղցկեղի և արյան հիվանդությունների կենտրոնի ղեկավար Գևորգ Թամամյանը նշում է, որ  Հայաստանը, լինելով ցածր և միջին եկամուտ ունեցող երկիր, այս բնագավառում իր ցուցանիշներով մոտ է զարգացած երկրներին․

«Մեր ապրելիության ցուցանիշները երբեմն մոտենում են 70-80 տոկոսի։ Դա այն պայմաններում, երբ միջոցները բավական սուղ են մեր երկրում, ոլորտը գրեթե միշտ եղել է թերֆինանսավորված»,- նշում է  նա։

Հայաստանում վերջին տարիներին ընդլայնվել է քաղցկեղի ախտորոշման համար կիրառվող մեթոդների ցանկը, ինչպես նաև առաջին անգամ գործարկվել է տարբեր ուռուցքների վաղ ախտորոշմանը, հիվանդության տարածվածության և բուժման արդյունավետության գնահատումը՝ պոզիտրոն էմիսիոն տոմոգրաֆիայի համակցված կոմպյուտերային տոմոգրաֆիայի միջոցով։

2018 թվականին ՀՀ-ում երեխայի մոտ առաջին անգամ կատարվել է աուտո տրանսպլանտացիա և մինչ օրս 11 դեպք է գրանցվել։ Թամամյանի խոսքով՝ այս բուժումների համար երեխաներն այլևս չեն գնում արտասահման։

Ըստ Թամամյանի՝ ոլորտի կարևոր խնդիրներից մեկը դեղորայքի գրանցման հարցն է, որը տասնամյակներ շարունակ առկա է։

Սամվել Դանիելյանը նշում է, որ դեղորայքի այն քանակը, որն անհրաժեշտ է քաղցկեղով հիվանդ երեխաների բուժման համար,  բիզնես հետաքրքրություն չի առաջացնում դեղագործական ընկերությունների համար և Հայաստանում որոշ բաներ բաց են մնում։ Սակայն նրա խոսքով՝ ամեն տարի ավելի առաջ ենք գնում։ Դինամիկա կա։

Հայաստանում տարեկան գրանցվում է 80-100 մանկական քաղցկեղի առաջնակի դեպք, որոնց մեջ գերակշիռ մասը արյան քաղցկեղն է։ Համաձայն վիճակագրության՝ մեր երկրում պացիենտների 70-75 տոկոսը լիովին առողջանում են։

Գևորգ Թամամյանի կարծիքով՝ այսօր մանկական ուռուցքաբանություն ու արյունաբանությունը ՀՀ-ում իր տեմպերով բժշկագիտության մեջ առաջատար տեղ է զբաղեցնում։