«Գործարք առաջարկում են այն կողմին, որը իրենից ինչ որ բան է ներկայացնում». պատգամավորը՝ «Վստեչի Ապերի» հայտարարության մասին (տեսանյութ)
Աջակցիր «Ա1+»-ին«Համոզված եմ, որ ոստիկանների գործողությունները իրավաչափ են, ոստիկանությունը պետք է գործի հատու, հստակ, երբեմն հարկադրանքի միջոցներ կիրառելով»,-այս մասին «Ա1+»-ին հայտնեց ՀՀ ԱԺ «Իմ քայլը» խմբակցության պատգամավոր Արմեն Խաչատրյանը, անդրադառնալով Արամ Վարդանյանի (Վստրեչի Ապեր) տանը իրականացված ոսոտիկանական գործողություններին։
Պատգամավորի պնդմամբ՝ բոլորը պետք է հասկանան, որ եթե ունեն քրեական անցյալ, ներկա, կամ շատ կասկածելի ներկա, այդպես է լինում՝ անընդհատ դառնում են ոստիկանության աշխատակիցների հյուրը, հրավիրվում են կամ բերման են ենթարկվում․
«Այդ մարդիկ պետք է մշտապես գտնվեն ոստիկանության տեսադաշտում, իսկ երեկվա գործողությունները ես համարում եմ իրավաչափ»։
Ինչ վերաբերում է Վարդանյանի հայտարարությունը, թե իրեն գործարք են առաջարկել ոստիկանները՝ Խաչատրյանն ասաց․
«Գործարք առաջարկում են այն կողմին, որը իրենից ինչ որ բան է ներկայացնում, ինչ-որ ուժ է ներկայացնում կամ ինչ-որ անհաղթահարելի ուժ է լինում։ Ոստիկանությունը այն մարմինը չէ, որ կարող է գործարք առաջարկել, ես բացառում եմ, որ ոստիկանությունը կարող է գործարք առաջարկել, իսկ եթե կա ոստիկան, որը գնում է գործարքի, ապա այդ գործարքի գնացողները պետք է օր առաջ պատասխանատվության ենթարկվեն»։
Պատգամավորն ասում է՝ եթե Վարդանյանը նման հայտարարություններ է անում, ապա թող ներկայանա քննությանը, ներկայացնի իր առարկությունները, իր պատկերացումները և քննարկվի այդ ամենը․
«Եթե անձը փախնում է քննությունից և ինչ-որ թաքուն տեղերից ինչ-որ հայտարարություններ է անում, ես չեմ էլ ուզում քննարկեմ դրանք»։
Ինչ վերաբերում է առհասարակ ոստիկանության կողմից անձին բերման ենթարկելու ինստիտուտին և մտահոգություններին, թե Հայաստանում սա վերածվում է «շոուի», պատգամավորն ասում է, որ մեր երկրում ոստիկանությունը միշտ եղել է մեղմ, հանդուրժողական մոտեցումներով, ինչը այսօր տեղին չէ։
«Ոստիկանությունը նրա համար չէ, որ ինչ-որ մեկին խնդրի, աղաչի, պաղատի»,-ասում է Խաչատրյանը։
Հարցին, թե արդյոք մարդու իրավունքների խնդիր չի առաջանում, երբ մատնաշված «հատու, հստակ» մեթոդներով անձին բերման են ենթարկում, հետո պարզվում է, որ ստացված տեղեկությունները սուտ էին և անձին բաց են թողնում, Խաչատրյանն ասում է․
«Ոստիկանությունը և իրավապահները պետք է գործեն օրենքի սահմաններում, չգերազանցեն իրենց լիազորությունները, ցանկացած այդպիսի դեպքերում քննարկման առարկա է դառնում իրավապահ մարմինների գործողությունների իրավաչափությունը»,-վստահեցնում է պատգամավորը։
Նրա պնդմաբ՝ այսօր խնդիր կա իրավապահ մարմինների լիազորությունների հստակեցման, մի շարք դեպքերում, ըստ պատգամավորի, իրավապհ համակարգի ներկայացուցիչները դառնում են անպաշտպան, ինչը իր հետ խնդիրներ է բերում։
