Ալեն Սիմոնյանի հորդորը՝ Էդմոն Մարուքյանին (տեսանյութ)
Աջակցիր «Ա1+»-ինԱԺ փոխխոսնակ Ալեն Սիմոնյանը լրագրողների հետ զրույցում, անդրադառնալով Սահմանադրության փոփոխության վերաբերյալ նախագծի հետկանչին, նշեց՝ որևիցե արտառոց բան տեղի չի ունեցել․ օրենսդրական նախագծի փաթեթը հետ է կանչվել։
«Եկեք հասկանանք, որ Ազգային ժողովի նիստը, որը չեղարկվել է, նշանակում է օրակարգը, որը հաստատել ենք այլևս գույություն չունի, օրակարգ է բերվելու նոր հարց»,- ասում է նա։
Ալեն Սիմոնյանն արձագանքեց Էդմոն Մարուքյանի այն հայտարարությանը, որ իշխանությունը «ինքն իր ոտքին է կրակում»։
«Ես մշտապես զարմացել եմ, որ պարոն Մարուքյանը, լինելով փորձառու պատգամավոր, ինչո՞ւ է այդքան հաճախ էմոցիաներին տրվում՝ ձեռքերով թափահարում, Հրայր Թովմասյանի հետ է խոսում տեսախցիկների միջոցով»,- ասում է Սիմոնյանը։
Նա Էդմոն Մարուքյանին հորդորեց լինել ավելի հանդարտ․ «Պարո՛ն Մարուքյան, Հրայր Թովմասյանը ձեզ բոլոր ձևերով էլ լսում է»։
ԱԺ փոխխոսնակն ընդունեց, որ Սահմանադրական դատարանի շուրջ ստեղծված ճգնաժամային վիճակի հանգուցալուծման քաղաքական որոշում է կայացվել:
«Այստեղ չկա անփութություն, կա մարտավարություն: Նայած պահի, նայած ժամանակ՝ ընտրել ենք տարբեր մարտավարություններ: Քաղաքացիներին հրավիրել ենք Ազգային ժողովի մոտ, որոշել ենք ձեռք մեկնել ՍԴ դատավորներին: Հիմա այս ձևով ենք գնում: Այո, քաղաքական որոշում է կայացվել, որ Սահմանադրական դատարանում, և դատական համակարգում առկա ճգնաժամը լուծում է ստանալու՝ որպես մի վերջին բաստիոն, որը մնացել է հին Հայաստանից», - ասաց նա:
Հարցին, թե իշխանությունը հակվա՞ծ է հանրաքվեի դնել այս նախագիծը, Ալեն Սիմոնյանն ասաց․
«Ես ձեզ հիմա դա չեմ ասի, բայց կասեմ հետեւյալը՝ մենք որեւէ խնդիր չունենք հանրաքվեի դնելու հետ կապված: Նաեւ վարչապետը հայտարարել է, որ ուղիղ կառավարումը մեզ համար ամենաընդունելի եւ գործածելի տարբերակն է»։
