ԿԳՄՍ ենթակառուցվածքների առումով ունենք շատ մտահոգիչ իրավիճակ․ Արայիկ Հարությունյան (տեսանյութ)
Աջակցիր «Ա1+»-ինԿրթության, գիտության, մշակույթի և սպորտի նախարար Արայիկ Հարությանի խոսքերով՝ կրթության համակարգում առկա են լրջագույն խնդիրներ՝ բարոյահոգեբանական վիճակից մինչև ենթակառուցվածքներ։
2018-ին Երևանի ավագանու և խորհրդարանական ընտրություններն ըստ Հարությունյանի, ցույց են տվել, որ բողոքներ չեն եղել դպրոցների քաղաքականացվածության առումով։ «Մենք չենք ունեցել դեպք, որտեղ իշխանությունը որևէ տեղում ներգրավել է վարչական ռեսուրս, մասնավորապես հանրակրթության ոլորտում, էլ չասեմ՝ միջին մասնագիտական ուսումնական հաստատություններում և բարձրագույն ուսումնական հաստատություններում»,- նշեց նա։
Ըստ Հարությունյանի՝ կրթական ոլորտում չնայած չի կարելի ասել, որ կոռուպցիայի հարցերը լուծվել են, սակայն համակարգային կոռուպցիա չկա։
«Ենթակառուցվածքների առումով ունենք շատ մտահոգիչ իրավիճակ։ Տիկին Զոհրաբյանը մի քանի օր առաջ նկարներ էր այստեղ ցուցադրում։ Տիկի՛ն Զոհրաբյան, ես կարող եմ մի քանի հարյուր տարբեր դպրոցներից Ձեզ նկարներ ցույց տալ և ոչ միայն հանրակրթական ոլորտից, այլ օրինակ՝ սպորտդպրոցներից, մշակութային օջախներից»,- ասաց ԿԳՄՍ նախարարը։
Այս տարի, ըստ Արայիկ Հարությունյանի, գիտական սարքերի հատկացմանը տրվել է լրացուցիչ 420 միլիոն դրամ (բյուջեով) և 300 միլիոն դրամից ավելի Ազգային ակադեմիայի խնայողությունների հիման վրա։ Խոսելով նախադպրոցական կրթության մասին օրենքի մասին՝ գերատեսչության ղեկավարն ասաց, որ լուրջ փոփոխություններ են նախատեսվել, որոնցով դայակների, դաստիարակների կարողությունների ուժեղացման մեխանիզմներ են ներդրվել։
«Մշակել ենք մոդել նախադպրոցական ուսումնական հաստատությունների համար, որը թույլ կտա զգալի մեծացնել նախադպրոցական ուսումնական հաստատությունների թիվը մարզերում»,- ընդգծեց նա։
