Պուտինի նախաձեռնությամբ, Փաշինյանի աջակցությամբ Նազարբաևը դարձավ պատվավոր նախագահ
Աջակցիր «Ա1+»-ինՀայաստանի վարչապետ Նիկոլ Փաշինյանը հետեւում է Ղազախստանում տեղի ունեցող քաղաքական զարգացումներին։ Նա այդ մասին ասել է Ղազախստանի Հանրապետության նախագահ Կասիմ-Ժոմարտ Տոկաևի հետ հանդիպմանը։
«Մաղթում եմ Ձեզ հաջողություններ առաջիկայում սպասվող նախագահական ընտրություններում: Վստահ եմ, որ Նուրսուլթան Նազարբաևի նախաձեռնություններն արվում են ի բարօրություն Ղազախստանի և նրա ժողովրդի: Մաղթում եմ ամենայն բարիք Ղազախստանի Հանրապետությանը և ղազախ ժողովրդին»,-ասել է Նիկոլ Փաշինյանը։
Կասիմ-Ժոմարտ Տոկաևը նախեւառաջ երախտագիտություն է հայտնել.
«Մենք երախտապարտ ենք Ձեզ` Ղազախստանի Հանրապետության առաջին նախագահ Նուրսուլթան Նազարբաևին Բարձրագույն Եվրասիական տնտեսական խորհրդի պատվավոր նախագահի կոչում շնորհելու վերաբերյալ Ռուսաստանի Դաշնության նախագահի նախաձեռնությանն աջակցելու համար»:
Ըստ նրա՝ Հայաստանը շատ մեծ դեր է խաղում ԵԱՏՄ-ում: Կասիմ-Ժոմարտ Տոկաևը նաեւ ընդհանրություններ է տեսնում. «Մենք մեծապես հետաքրքրված ենք շարունակելու ընդլայնել ձեր պետության հետ մեր բարեկամական հարաբերությունները: Մենք մեծ հարգանք ենք տածում ձեր երկրի, ձեր ժողովրդի նկատմամբ, քաջատեղյակ ենք ձեր ժողովրդի պատմությանը, որը սերտորեն միահյուսվում է մեր ժողովրդի պատմությանը: Այդ իսկ պատճառով մենք շատ ընդհանրություններ ունենք»:
Ինչ վերաբերում է կոնկրետ հարցերին, հայկական շուկան գործնականում մեծ հետաքրքրություն է ներկայացնում Ղազխաստանի արդյունաբերության համար:
«Մենք կարող ենք սերտ համագործակցել Ղազախստանի լոգիստիկ հնարավորությունների կիրառման համատեքստում»,-ասել է նա:
Նիկոլ Փաշինյանն էլ է համաձայն, որ այն ներուժը, որ կա այդ ոլորտում, լիարժեք չի իրացվում. «Պետք է շարունակել աշխատել այդ ուղղությամբ, որպեսզի ԵԱՏՄ բոլոր անդամ երկրների միջև առկա ներուժը լիարժեք ծավալով իրագործվի»:
Ըստ ՀՀ Վարչապետի մամլո ծառայության՝ Նիկոլ Փաշինյանը և Կասիմ-Ժոմարտ Տոկաևը վերահաստատել են հայ-ղազախական հարաբերությունների հետագա ընդլայնման ու խորացման ուղղությամբ սերտ համագործակցությունը զարգացնելու պատրաստակամությունը:
