ԴԱՍԱԿԱՆ ԵՐԱՇՏՈՒԹՅՈՒՆ ՈՐՄՆԱՆԿԱՐՆԵՐԻ ՍՐԱՀՈՒՄ
Աջակցիր «Ա1+»-ինԱյսօր Հայաստանի ազգային պատկերասրահի Որմնանկարների սրահում թավջութակահար Դենիս Ժդանովը իր համերգից առաջ հանդիպեց լրագրողների հետ:
Համերգը անցկացվում է «Ազգային պատկերասրահ» միջազգային երաժշտական երրորդ փառատոնի շրջանակներում:
« Ինձ ոչ ոք չի պարտադրել, որ ինչ- որ բանով զբաղվեմ, ինչքան հիշում եմ ինձ` կապված եմ երաժշտությանը:Շատ ուրախ եմ, որ եկել եմ Հայաստան եւ նորից մասնակցում եմ մրցույթին»,- ասում է Գերմանիայից ժամանած թավջութակահար Դենիս Ժդանովը, որը բազմաթիվ միջազգային մրցույթների դափնեկիր է:
Նա մեծ խանդավառությամբ է հիշում, որ առաջին երաժշտական գործիքը իրեն նվիրել է իր տատիկը: Նա նշեց, որ մեծ հաճույքով կհամագործակցի մեր կոմպոզիտորների հետ: 2006 թվականին Դենիս Ժդանովը Ա. Խաչատրյանի անվան միջազգային մրցույթում արժանացել է «Հանդիսատեսի համակրանք» եւ ժյուրիի Հատուկ մրցանակներին:
«Փառատոնը նպատակ ունի ներկայացնելու եւ պրոպագանդելու դասական երաժշտությունը: Այն նորովի է ընկալվում, քանի որ այն անցկացվում է ոչ թե համերգային սրահում, այլ պատկերասրահում՝ Որմնանկարների սրահում, ինչը առիթ է հանդիսանում, դասական երաժշտության յուրովի ընկալելուն»,- ասում է «Ազգային պատկերասրահ» երաժշտական փառատոնի հիմնադիր Մարիամ Շահինյանը:
Նա նաեւ նշեց, որ իրենք բացի գարնանային փառատոնից այս տարի ուզում են կազմակերպել նաեւ աշնանային փառատոն:
Փառատոնը անց է կացվում «Հայաստան» Համահայկական Հիմնադրամի եւ ՀՀ Մշակույթի եւ երիտասարդության հարցերի նախարարության աջակցությամբ:
