ԱԶԳԱՅԻՆ ԳՐԱԴԱՐԱՆՈՒՄ ԴԵՌ ՀԻՇՈՒՄ ԵՆ ՏԻԳՐԱՆ ԼԵՎՈՆՅԱՆԻՆ
Աջակցիր «Ա1+»-ինԱյսօր Հայաստանի ազգային գրադարանում նոտային երաժշտական գրականության բաժնի նախաձեռնությամբ նշվեց Հայաստանի ականավոր ռեժիսոր, Ազգային օպերայի եւ բալետի թատրոնի տնօրեն ու գեղարվեստական ղեկավար Տիգրան Լեւոնյանի ծննդյան 70-ամյակը:
Գրադարանում կազմակերպվել էր ցուցադրություն` հոբելյարի անցած ճանապարհի վերաբերյալ, իսկ ողջ ընթացքում հնչում էր Տիգրան Լեւոնյանի կատարմամբ երաժշտություն: Միջոցառմանը ներկա գրադարանավարները մեծ երախտագիտությամբ ու սիրով էին հիշում մեծ ռեժիսորին:
Տիգրան Լեւոնյանը ծնվել է 1936թ. դեկտեմբերի 14-ին, Բեյրութում: Երկար տարիներ լինելով թատերախմբի առաջատար տենորը` մեծ հաջողությամբ երգել է համաշխարհային եւ ազգային օպերային խաղացանկի գլխավոր դերերգեր:
«Հետագայում Տիգրան Լեւոնյանը զուգակցում է երգչական եւ ռեժիսորական գործունեությունը` բեմադրելով դասական օպերաներ, ինչպես նաեւ ժամանակակից հայ կոմպոզիտորների մի շարք երկեր:
Երգիչ եւ բեմադրիչ Լեւոնյանին ծափահարել են ԱՄՆ-ն եւ Ֆրանսիան, Գերմանիան եւ Եգիպտոսը, Ռուսաստանը եւ Մերձբալթիկան, Հունգարիան, Լեհաստանը եւ այլն: Նրա բազմակողմանի տաղանդը դրսեւորվել է նաեւ կինոյում»,- հիացմունքով ներկայացնում էր նոտային երաժշտական գրականության բաժնի տնօրեն Մարինա Սիմյոնովան:
Տիգրան Լեւոնյանը Երեւանի Կոմիտասի անվան կոնսերվատորիայի պրոֆեսոր է եղել եւ ղեկավարել է օպերային բեմարվեստի ամբիոնը: Նա ունի ժողովրդական արտիստի կոչում:
