ՀՀԿ-ականը կանխատեսում է՝ Վիգեն Սարգսյանն անակնկալ կմատուցի
Հանրապետական Հակոբ Հակոբյանը կանխատեսում է, որ պաշտպանության նախարար Վիգեն Սարգսյանը ԱԺ ամբիոնից անակնկալ կմատուցի 1000 դրամի դեմ բողոքողներին. «Կարծում եմ, որ հիմա ինքը կասի՝ ով չի ուզում, չի տալու»: Պարոն Հակոբյանը համաձայն է, որ աշխատավորից 1000 դրամ վերցնելը հարկային պարտավորություն չէ: Բայց ո՞վ է տեսել, որ քաղաքացու հանգանակությունը լինի ամենամսյա. «Քանի որ զոհերը մեր մոտ, որը շատ վատ է իհարկե, հաճախակի է լինում, չի կարող միանգամյա հանգանակություն լինել»: ԲՀԿ խմբակցության անդամ Ստեփան Մարգարյանն առաջարկում է 1000 դրամը աշխատավորից գանձել հարկի տեսքով: Ինքը պաշտպանության նախարարի այս գաղափարը համարում է ուշացած. «Չի հերիքում գումարը բյուջեից՝ ավելացնու՞մ ենք հարկերը, եկեք հենց այդպես էլ անենք՝ ավելացնենք հարկերը»: Ստեփան Մարգարյանին դուր չի գալիս հատուկ այս գումարը հավաքելու նպատակով ստեղծվելիք հիմնադրամը՝ պետությունն արդեն իսկ ունի ինստիտուտներ, որոնց միջոցով քաղաքացիներից գումար է հավաքում. «Պետական մեխանիզմի նկատմամբ անվստահություն է էստեղ առաջանում»: ՀԱԿ խմբակցության ղեկավար Լեւոն Զուրաբյանը հարցին ուղիղ է նայում՝ տարեկան 2,7 միլիարդ դոլար է թալանվում Հայաստանում, նախ թող այդ գումարները վերադարձնեն պետբյուջե. «Գլոբո ֆայնենշըլ» կազմակերպության զեկույցի համաձայն 2004 թվականից ի վեր փողերի լվացման միջոցով ապօրինաբար Հայաստանից դուրս է բերվում միջին հաշվով 1 միլիարդ դոլարի կապիտալ»: Այսքան գումար վերադարձնելու դեպքում կարելի է ոչ միայն սահմանին ծառայող զինվորի ապահովագրության հարցը լուծել, այլեւ բարձրացնել կենսաթոշակները. «Թողում են բյուջեն մսխվի, թողնում են անարդյունավետ ծախսեր: Օրինակ ինչու՞ համար եք պահում 20 հազարանոց ոստիկանություն»: Ոստիկաններն, ըստ Լեւոն Զուրաբյանի, պետք են ռեժիմը պահպանելու համար: Նրան հայտնի չէ, որ աշխարհի որեւէ երկրում առանց հարկային պարտավորության միայն պաշտպանության նախարարի մտահղացմամբ քաղաքացուց գումար վերցնեն պետական մակարդակով. «Ցանկացած նախարար կարող է գլուխը պատով տալ: Բայց գոյություն ունի կառավարություն: Կառավարությունը սրան հավանություն է տվել: Դրա համար պատասխանատու է ամբողջ կառավարությունըԿարեն Կարապետյանի գլխավորությամբ»: Աշխատավորին քերթում են: Լեւոն Զուրաբյանն այլ խոսք չունի տեղի ունեցածը բնորոշելու համար:
