Էլինա Դանիելյանը եւ Լեւոն Արոնյանը ոչ-ոքի արեցին
Հայաստանի շախմատի կանանց եւ տղամարդկանց առաջատարները ներկայումս հանդես են գալիս աշխարհի խոշորագույն երկու մրցաշարերում: Էլինա Դանիելյանն այսօր առաջին պարտիան է անցկացրել Բաթումում մեկնարկած ՖԻԴԵ-ի կանանց Գրան-պրիում: Նա սեւ խաղաքարերով ոչ-ոքի է խաղացել Ֆրանսիան ներկայացնող մոլդավացի շախմատիստուհի Էլմիրա Սկրիպչենկո-Աղաբաբյանի հետ: Երկրորդ տուրում Էլինա Դանիելյանը սպիտակներով կհանդիպի ռուսաստանցի Վալենտինա Գունինայի հետ: Մեր առաջատար շախմատիստ Լեւոն Արոնյանն այսօր երկրորդ հանդիպումն անցկացրեց Նորվեգիայում ընթացող շախմատի գերմրցաշարում: Նա սեւերով հանդիպեց շվեդացի Նիլս Գրանդելիուսի հետ եւ արդեն 32-րդ քայլին ոչ-ոքի արեց: Երկու տուրից հետո Լեւոն Արոնյանը ունի 1 միավոր եւ առայժմ բաժանում է 4-7-րդ տեղերը: Վաղը նախատեսված 3-րդ տուրում մեր շախմատիստը սպիտակներով կփորձի հաղթել չինացի Չաո Լիին:
