Բացել լրահոսը Փակել լրահոսը
A A

Եթե Սուրիկ Խաչատրյանը դեմոկրատ է (տեսանյութ)

Քաղաքականություն
e5210b9e6f04f91f43555d50c47a88a2

ԱԺ արտահերթ նիստում այսօր համայնքների խոշորացման մասին նախագծի քննարկմանը ՀԱԿ խմբակցության քարտուղար Արամ Մանուկյանը նշեց, որ կան համայնքներ, որոնք խոշորացման արդյունքում կոչնչացնեն ՏԻՄ  ինստիտուտը. «Դուք միացնում եք համայնքները, որը չի կարելի: Ես իսկապես խոշորացման կողմնակիցն եմ, սակայն իմ արգումենտը հիմա հետեւյալն է, որ պիլոտային այս ծրագրում ներառված գյուղերում մարդկային ու ֆինանսական ռեսուրս չի մնացել, այդ պատճառով չի կարելի գնալ այդ քայլին: Գյուղացիք մեղավոր չեն պետության ֆինանսական սղության համար, բյուջեն է մեղավոր: Խոշորացման այս ծրագրում ներառված չորս գյուղերից մեկում առաջին դասարան չկա»: Արամ Մանուկյանը կոչ է անում պիլոտային այս ծրագիրը իրականացնել միայն մեկ Սյունիքում, ապա ուսումնասիրությունները շարունակել մյուս մարզերում. «Երեկ Էդուարդ Շարմազանովը հայտարարեց, թե Սյունիքում տեղի ունեցած ընտրությունները դեմոկրատական էին: Դե եթե Սյունիքի քվեարկության արդյունքները դեմոկրատիա են համարում, իսկ մարզպետ Սուրիկ Խաչատրյանին՝ դեմոկրատ, ես ոչինչ չունեմ ասելու: Օրինակ՝ Թումանյանի շրջանի համայնքներում մշակույթն ու ավանդույթներն են տարբեր, իրար չեն սիրում, ո՞նց եք դուք իրենց միացնում»: ՀՅԴ խմբակցության ղեկավար Արմեն Ռուստամյանը դեմ է այսօր քննարկել նման նախագիծ, երբ երկիրը կանգնած է կարեւորագույն փոփոխությունների՝ սահմանադրական փոփոխությունների առաջ: «Բաժանիր, որ տիրես».Էդմոն Մարուքյան   ԱԺ պատգամավոր Էդմոն Մարուքյանն իր ելույթում, անդրադառնալով համայնքների խոշորացմանը, նշեց. «Որտեղ շատ մարդ, այնքան շատ փող, որտեղ քիչ մարդ, այնտեղ քիչ փող ու այդ համայնքները մեռնում են: Ես սեմինարներ եմ անցկացրել համայնքներում ու այստեղ միշտ դեմ են եղել խոշորացմանը: Մինչդեռ երբ բացատրում էինք նրանց, նրանք հասկանում են, որ դա լավ բան է: Ես զարմանում եմ, որ ԱԺ-ում եղան մարդիկ, որոնք մասնակցել են այս նախագծի ստեղծմանը ու հիմա քննադատում են այն»: Ըստ նրա, կա մի սկզբունք՝ բաժանիր, որ տիրես. «Ինը հարյուրից ավելի համայնք ենք ստեղծել ՀՀ-ում, իսկ դա նշանակում է, որ անհնարին է, որ այդ համայնքները համաչափ զարգանան ու իրենց բյուջեով կարողանան մի հարց լուծել, ասենք՝ մի ջրագիծ անցկացնեն: Խոշորացման ծրագիրը լավն է, սակայն իրականացման ընթացակարգը քննադատում եմ»: Պարոն Մարուքյանը քննադատեց պիլոտային այս ծրագրում ներառված Տավուշի, Սյունիքի եւ Լոռու մարզերում անցկացված հանրաքվեները. «Կարծում եմ, որ այլեւս նման հանրաքվե չեք անցկացնի, քանի որ դա եւս մեկ անգամ անվստահություն է արմատավորել մարդկանց մեջ ընտրական համակարգի նկատմամբ: Նրանք ասում են՝ քվեարկել ենք «ոչ» ու էլի հաշվի չեն առել մեր ձայնը: Ուղղակի նրանց պետք է բացատրել, որ այդ հանրաքվեի արդյունքները պարտադիր չեն: Ես կարծում եմ՝ դրա փոխարեն կարելի էր ընդամենը հարցում անցկացնել, այլ ոչ թե հանրաքվե»: Էդմոն Մարուքյանը հայտարարեց, որ ինքը կողմ է քվեարկելու այս նախագծին: