ՄԱՐԶԱԿԱՆ ԼՈՒՐԵՐ
Աջակցիր «Ա1+»-ինՎԼԱԴԻՄԻՐ ՀԱԿՈԲՅԱՆԻ ՀԱՋՈՂ ՄԵԿՆԱՐԿԸ
Ջիբլարթարում մեկնարկել է շախմատի միջազգային մրցաշար, որին մասնակցում է Հայաստանի ուժեղագույն գրոսմայստերներից մեկը՝ Վլադիմիր Հակոբյանը: Մեկնարկային տուրում Հակոբյանը սեւերով պարտության մատնեց վարկանիշով իրենից բավականին ցածր շախմատիստ Պոնտուս Կարլսոնին:
Մրցաշարում հանդես են գալիս մի քանի ճանաչված շախմատիստներ, ինչպիսիք են անգլիացի Նայջըլ Շորթը, Իսպանիան ներկայացնող Ալեքսեյ Շիրովը, ռուս Վիկտոր Կորչնոյը եւ այլոք:
Ի դեպ, Վլադիմիր Հակոբյանը վարկանիշով 2-րդն է մրցաշարում: 2-րդ տուրում Հակոբյանի մրցակիցը կլինի Մարտին Արիզմենտին:
ՀԱՄԼԵՏ ՄԽԻԹԱՐՅԱՆԸ ՀԱՆԴԵՍ ԿԳԱ ՇՈՏԼԱՆԴԻԱՅՈՒՄ
Ֆուտբոլի Հայաստանի հավաքականի կիսապաշտպան Համլետ Մխիթարյանն օրերս կտեղափոխվի շոտլանդական «Հարթս» ակումբ, որը այդ երկրի լավագույն թիմերից մեկն է: Մխիթարյանը ներկայումս հանդես է գալիս բելառուսական «ՄՏԶ Ռիպո» թիմում, որի առաջատարն էր համարվում, իսկ 2005թ. Բելառուսում ճանաչվեց լավագույն արտասահմանցի ֆուտբոլիստ:
Համլետը «Հարթս» պետք է տեղափոխվեր դեռեւս անցած տարի, սակայն տարբեր պատճառներով նրա տեղափոխումը հետաձգվեց:
ԳԱԼՈՒՍՏ ՊԵՏՐՈՍՅԱՆԸ ՓՈՐՁԱՇՐՋԱՆ Է ԱՆՑՆՈՒՄ «ԶԱԿԱՐՊԱՏՅԵՈՒՄ»
Հայաստանի հավաքականի ֆուտբոլիստ Գալուստ Պետրոսյանը փորձաշրջան է անցնում ուկրաինական «Զակարպատյե» թիմում: Վերջինս ներկայումս եզրափակում է Ուկրաինայի առաջնության մրցաշարային աղյուսակը եւ թիմի ղեկավարները մտադիր են ուժեղացնել ակումբի կազմը 2-րդ շրջանի մեկնարկից առաջ:
Գալուստի տրանսֆերը պատկանում է մոլդովական «Զիբրու» ակումբին, որտեղ նա տեղափոխվել էր Երեւանի «Փյունիկից»:
