ՀԱՅ ԵՐԻՏԱՍԱՐԴՆԵՐԸ ՋԱԶ ԵՆ ՍԻՐՈՒՄ
Աջակցիր «Ա1+»-ին«Երիտասարդներն ավելի մոտ են կանգնած ջազին, ուստի նրանց մոտ ավելի լավ է ստացվում պատկերել ջազը»,- այսօր Նկարիչների միությունում «Ջազի գույները» երիտասարդական ցուցահանդեսի բացման ժամանակ ասաց ԱԺ պատգամավոր Հրանուշ Հակոբյանը:
Ցուցահանդեսը կազմակերպվել է Նկարիչների միության եւ Հայաստանում ԱՄՆ դեսպանատան աջակցությամբ` «Ջազի օրերը Հայաստանում» միջոցառման շրջանակում:
Ցուցահանդեսում ներկայացված էին նկարիչների միության 63 երիտասարդ անդամների նկարները, որոնք ավարտել են կամ Գեղարվեստի պետական ակադեմիան, կամ Թերլեմեզյանի անվան գեղարվեստի ուսումնարանը:
«Յուրաքանչյուր ստեղծագործություն պետք է ասելիք ունենա: Այս դեպքում իմ ասելիքը ջազ երաժշտությունն է»,- նշեց երիտասարդ նկարիչ Սեւադա Սարգսյանը:
Նկարիչների միության երիտասարդական միավորման նախագահ Աննա Հարությունյանը հայտնեց, որ ապրիլի 15-ին անցկացվելու է մրցույթ, որտեղ երիտասարդ նկարիչները ջազ երաժշտության ներքո պատկերելու են ջազը, քանի որ ինչպես ինքն է նշում՝ «լավ ստեղծագործությունը ծնվում է լավ երաժշտության ներքո»: