«Ոչինչ չէր փոխվել, հանրապետականի ոգով և մանվելիզմի կիրառմամբ համագումար էր»
ԵԿՄ համագումարում գրեթե ոչինչ չէր փոխվել: Աղքատ երկրապահի ներկայացուցիչները գտնվում էին դահլիճի ետևում, իսկ քաղաքական և պետական այրերը գտնվում էին դահլիճի առջևում: Սա հապճեպության մեջ, հանրապետականի ոգով և մանվելիզմի կիրառմամբ համագումար էր, որի կազմը բաղկացած էր օլիգարխիկ համակարգով. ասում է «Կոռնիձոր» ջոկատի հրամանատար Արա Խուդավերդյանը: «Զորավար Անդրանիկ» ջոկատի հրամանատար, բարեգործական ՀԿ-ի նախագահ Վոլոդյա Մաթևոսյանը սխալ է համարում, որ ԱԺ պատգամավորը լինի նաև երկրապահի անդամ, նրա կարծիքով օրենսդրի ներկայացուցիչը չպետք է լինի վարչության նախագահ կամ անդամ: «Պատերազմ չտեսած մարդը ինչպե՞ս կարող է լինել երկրապահի անդամ: Եթե չկռվածները լինեն երկրապահի անդամ, էս երկրի վիճակը ի՞նչ է լինելու: Սասուն Միքայելյանը խելացի տղա է, Մանվելի մնացորդներին պետք է ասի՝ հավաքվեք գնացեք: Եթե ինքն էլ չհանի՝ մենք կբոյկոտենք: Ազատամարտիկները նշեցին, որ իրենք պատրաստ են պատերազմի դեպքում կրկին գնալ կռիվ, սակայն իրենց անդամակցությունը կդադարեցնեն ԵԿՄ-ում. «Մենք հիասթափվել ենք երկրապահից, ուզում էինք, որ երկրապահը լիներ երկիրը պահող, ոչ թե երկիրը թալանող». ավելացրեց Վոլոդյա Մաթևոսյանը: Նրանք նշեցին, որ առաջիկայում խորհրդակցելով չհրավիրված ազատամարտիկների հետ հնարավոր է ստեղծեն իրենց առանձին միությունը, որտեղ կընդգրկվեն միայն պատերազմի մասնակիցները: