Ավելի շատ հնդիկ կգա Հայաստան. հարցազրույց Հնդկաստանի արտակարգ եւ լիազոր դեսպանի հետ (տեսանյութ)
1947 թվականից ուժի մեջ մտավ Հնդկաստանի Անկախության Ակտը, և երկրի առաջին վարչապետ Ջավահարլալ Ներուն Դելիում առաջին անգամ բարձրացրեց անկախ Հնդկաստանի ազգային դրոշը: Մեծ Բրիտանիայից անկախացած Հնդկաստանում տոնը նշվում է անկախ ազգային պատկանելությունից կամ դավանանքից ու խորհրդանշում է ժողովրդավարական Հնդկաստանի միաբան լինելու ձգտումը: Երկրի բոլոր քաղաքներում այս օրը պետական պաշտոնյաների եւ հանրային գործիչների ներկայությամբ կատարվում Է դրոշի բարձրացման արարողություն: Հնդկաստանի անկախության հռչակման 71-րդ տարեդարձը նշվեց նաեւ Հայաստանում Հնդկաստանի դեսպանատանը՝ ազգային դրոշի հանդիսավոր բարձրացման արարողությամբ: «Մեզ համար կարեւոր այս օրվա միջոցառումներին հրավիրել ենք Հայաստանում բնակվող բոլոր հնդիկներին եւ Հնդկաստանի բարեկամներին»,-«Ա1+»-ի հետ զրույցում ասաց Հայաստանում եւ Վրաստանում Հնդկաստանի արտակարգ եւ լիազոր դեսպան Յոգեշվար Սանգվանը: Հայաստանն ու Հնդկաստանը դիվանագիտական հարաբերություններ հաստատել են 1992 թվականից: Դրանք, ըստ դեսպանի, միշտ հրաշալի են եղել: «Անկախ նրանից, թե որ կառավարությունը կամ նախագահն է իշխանության գլուխ, Հայաստանի հետ մեր հարաբերությունները հրաշալի են: Հայաստանի նախկին 3 նախագահները այցելել են Հնդկաստան, մեր 2 փոխնախագահները եղել են Հայաստանում: Փոխնախագահ Համիդ Անսարին այցելել է նախորդ տարվա ապրիլին: Մենք Հայաստանի հետ ունենք հրաշալի քաղաքական հարաբերություններ, միմյանց աջակցում ենք նաեւ միջազգային հարթակներում, ՄԱԿ-ում: ՀՀ վարչապետ Նիկոլ Փաշինյանի հետ վերջերս հանդիպման ժամանակ էլ, նա անձամբ վերահաստատեց, որ Հնդկաստանը այն 5 երկրների թվում է, որոնց հետ Հայաստանը զարգացնելու հարաբերությունները: Այնպես որ, հայ-հնդկական հարաբերությունները շարունակելու են մնալ հրաշալի ու զարգանալ»,-նշեց Հնդկաստանի դեսպանը: Յոգեշվար Սանգվանը միաժամանակ նկատեց, որ ներկայում կենտրոնացել են Հայաստանի ու Հնդկաստանի միջեւ առեւտրական, տնտեսական ու մշակութային հարաբերությունները ընդլայնելու վրա: «Առավելապես փորձում ենք խորացնել բիզնես կապերը, մարդկանց միջեւ կապերը: Բիզնես ոլորտում հարաբերությունները ցանկալի նշաձողին դեռ չեն հասել, սակայն, մենք ձգտում ենք զարգացնել հարաբերությունները, կազմակերպել բիզնես պատվիրակությունների այցեր Հայաստան»,-ասաց նա: Վերջերս ԲՀԿ նախագահ Գագիկ Ծառուկյանը Հնդկաստանի դեսպանի հետ հանդիպման ժամանակ Հայաստան էր հրավիրել շուրջ 100 հնդիկ գործարարի: Ըստ դեսպան Սանգվանի, այդ գործընթացն արդեն ընթանում է ու շարունակական է լինելու: Հիշեցնենք, որ 2017 թվականի նոյեմբերի 21-ից Հայաստանը պարզեցրել է Հնդկաստանի քաղաքացիներին մուտքի արտոնագրեր տրամադրելու գործընթացը: Դրական տեղաշարժն արդեն երեւում է: «Հայերի համար եւս խնդիր չէ գնալ Հնդկաստան: Նրանք կարող են գալ դեսպանություն եւ տեղում ստանալ վիզա, ինչպես նաեւ կարող են ստանալ էլեկտրոնային վիզա: Հիմա երկու երկրների միջեւ այս գործընթացի արդյունքում մարդիկ ավելի շատ կգան Հայաստան, կզարգանա նաեւ տուրիզմը, ավելի շատ գործարարներ ու Բոլիվուդյան պրոդյուսերներ կգան, քանի որ Հայաստանը շատ գեղեցիկ երկիր է նկարահանումներ կատարելու համար: Վերջերս «Էյր Արաբիա» ընկերությունը Հայաստան էր հրավիրել Բոլիվուդյան հայտնի դերասանուհի Հումա Կուրեշիին եւ նրա եղբորը: Նրանց հետ էր նաեւ Բոլիվուդյան հայտնի ռեժիսոր, որը մտածում է Հայաստանում ֆիլմի նկարահանման մասին: Այնպես որ, Հայաստանի նկատմամբ հետաքրքրությունը աճում է»,-ասաց Յոգեշվար Սանգվանը: Ի դեպ, Հնդկաստանի Հարիանա նահանգի եւ Հայաստանի Շիրակի մարզի ղեկավարների միջեւ նախորդ տարի պայմանավորվածություն էր ձեռք բերվել ընդլայնել համագործակցությունը, հատկապես մշակույթի ու սպորտի ոլորտներում: Նախաձեռնությունը Հնդկաստանի դեսպանը ողջունելի համարեց. «Գաղափարը լավն է, կարծում եմ, որ այն կխթանի Հարիանայի ու Շիրակի միջեւ բիզնես կապերը, մարդկանց միջեւ կապերը»: