«Գոտկատեղից ներքեւ քարոզարշավ չանեք». Նաիրա Զոհրաբյան (տեսանյութ)
«Բարգավաճ Հայաստանը» առաջիկայում կհրապարակի Երեւանի քաղաքապետի իր թեկնածուի անունը: Այս մասին այսօր «Ա1+»-ին ասաց ԲՀԿ խմբակցության պատգամավոր Նաիրա Զոհրաբյանը. «Քաղաքապետի թեկնածուի հետ կապված մենք ունենք ընդամենը մեկ որոշում՝ «Բարգավաճ Հայաստանը» մասնակցելու է ավագանու արտահերթ ընտրությանը: Ով կլինի մեր թեկնածուն, պարզ կլինի առաջիկա օրերին»: Տիկին Զոհրաբյանը չբացառեց, որ քննարկվում է քաղաքապետի պաշտոնում իր թեկնածությունը. «Կապրենք, կտեսնենք»։ ՔՊԿ- ի թեկնածությանն էլ նա վերաբերում է հարգանքով եւ ասում. ոչ ոք իր հակառակորդը չի, բոլորը մրցակիցներ են. «Մենք հարգանքով ենք վերաբերում Քաղաքացիական Պայմանագիր կուսակցության որոշմանը եւ առաջիկայում բոլոր քաղաքական ուժերը եւս կառաջադրեն թեկնածու: Բոլորիս նպատակը մեկն է՝ ունենալ ապրելու համար հարմարավետ Երեւան: Որոշողը լինելու է երեւանցին։ Եվ մի կոչ, մի հորդոր բոլոր քաղաքական ուժերին, որոնք մասնակցելու են առաջիկա քարոզարշավինեթե սիրո ու հանդուրժողականության թավշյա հեղափոխության արդյունքում մենք ունենալու ենք նույնքան այլանդակ ընտրարշավ, որքան եղել են նախկին բոլոր ընտրարշավները, ապա դա լինելու է թիկունքից հարված այս գեղեցիկ հեղափոխությանը»։ «Գոտկատեղից ներքեւ քարոզարշավ յուրաքանչյուր քաղաքական ուժ կարող է տանել, մենք կոչ ենք անելու գնալ արժանապատիվ քարոզարշավի, ոչ թե թիրախավորել, վիրավորել միմյանց, այլ երևանցուն ներկայացնել Երեւանի զարգացման ծրագիրը։ Որոշողն ու գնահատողը լինելու է երեւանցին»,- ասաց նա։ Ռոբերտ Քոչարյանի կալանավորման, նրան կալանքից ազատելու օգտին ստորագրահավաք կազմակերպելու վերաբերյալ հարցերը Նաիրա Զոհրաբյանը հրաժարվեց մեկնաբանել. «Այդ հարցի վերաբերյալ մեր պատասխանը հստակ է, խնդիրը գտնվում է իրավական դաշտում և ես որեւէ հարցի չեմ պատասխանելու»։
