Հայաստանում կկառուցվի աշխարհի 10 ամենաերկար զիփլայններից մեկը
Yell extreme park-ն առաջիկայում կկառուցի 2400 մետր երկարությամբ զիփլայն, որը կլինի աշխարհում 10 ամենաերկար զիփլայններից մեկը, չնայած նախկինում նախատեսվում էր, որ Հայաստանը կունենա աշխարհում ամենաերկար զիփլայնը:Այս մասին լրագրողների հետ հանդիպմանն ասաց Yell extreme park-ի հեղինակ և համահիմնադիր Տիգրան Չիբուխչյանը:
«Տեխնիկական, ինժեներական ռեալ խնդիրներ կային, մոտակայքում գտնվող բլուրը խանգարեց աշխատանքներին, քանի որ ունեինք թերի տվյալներ տեղագրության հետ կապված: Մինչ այդ խնդիրները կլուծեինք, հայտարարվեց Դուբայում, ապա նաև Հարավային Կորեայում աշխարհի ամենաերկար զիփլայնների կառուցման մասին»:
Հետևաբար, ըստ Տիգրան Չիբուխչյանի, արդեն ակտուալ չեն Հայաստանում ամենաերկար զիփլայնը կառուցելու մասին ծրագրերը:
«Մենք հիմա աշխատում ենք եղած ծառայությունները բարեկարգելու, դրանք եվրոպական ստանդարատներին համապատասխանեցնելու և այցելուների համար ավելի հարմարավետ դարձնելու ուղղությամբ»:
Ըստ Տիգրան Չիբուխչյանի՝ անցած տարի զբոսաշրջիկների հոսքը Ենոքավան կազմել է շուրջ 55 հազար, իսկ այս տարի ակնկալվում է թիվը հասցնել մինչև 68 հազարի:Այդ նպատակով նախատեսվում է ավելացնել մոտավորապես 20 նոր ծառայություններ:
Ի դեպ՝ Yell extreme park-ն այս տարի նշում է ծննդյան 3-րդ տարեդարձը, որի շրջանակներում Ենոքավան այցելած մարդիկ 2 օր կմասնակցեն Yell extreme park-ի ծննդյան միջոցառումներին
