Պավլիկ Մանուկյան. Ոստիկանի վրա ոչ թե Բիլյանն է կրակել, այլ Էդվարդ Գրիգորյանը (տեսանյութ)
«Սասնա Ծռեր» զինված խմբի անդամ Պավել Մանուկյանը, որը մեղադրվում է երկու տարի առաջ ՊՊԾ գունդը գրավելու եւ մի շարք այլ հանցագործություններ կատարելու մեջ, այսօր Երեւանի ընդհանուր իրավասության դատարանի Շենգավիթի նստավայրում, հերթական նիստի ժամանակ նոր բացահայտումներ արեց:
Պավել Մանուկյանը հայտարարեց, որ Արմեն Բիլյանին սխալ մեղադրանք է առաջադրվել:
«Ոստիկանի ուղղությամբ պատահական կրակողը Արմեն Բիլյանը չէ: Պատահական կրակոցով ձեռքից վիրավորված մարդը, որը հետո արյան վարակով մահացավ, այդ պատահական կրակոցի հեղինակը իմ մարտական ընկեր, իմ սիրելի ընկեր Էդվարդ Գրիգորյանն է, որի համար մեղադրվում է Արմեն Բիլյանը»:
ՊՊԾ գնդում վիրավորված, հիվանդանոցում մահացած ոստիկանը Գագիկ Մկրտչյանն է:
Պավել Մանուկյանը եւս մեկ հայտարարություն արեց՝ ասելով, որ ՊՊԾ գնդի տարածքում տեղադրված բանկոմատը բացել է ոչ թե Արմեն Բիլյանը, այլ իրենց սիրելի ընկեր Մխիթար Ավետիսյանը. «Խնդրում եմ՝ վերականգնեք արդարությունը»,-ասաց Պավել Մանուկյանը:
Հիշեցնենք, որ Էդվարդ Գրիգորյանի եւ Մխիթար Ավետիսյանի խափանման միջոցները փոխվել են եւ նրանք ազատ են արձակվել:
