Հայաստանի պատանի ըմբիշները կպայքարեն Եվրոպայի չեմպիոնության համար
Մակեդոնիայի մայրաքաղաք Սկոպյեում մեկնարկած ըմբշամարտի Եվրոպայի պատանեկան առաջնությունում գերազանց են սկսել ելույթները Հայաստանի ազատ ոճային ըմբիշները:
Մրցումների առաջին օրը մեր ըմբիշներից երկուսը մտել են եզրափակիչ եւ կպայքարեն չեմպիոնի կոչման համար: 45 կգ քաշային կարգում Ռաֆայել Հարությունյանը կիսաեզրափակիչում 10-0 հաշվով պարտության մատնեց ադրբեջանցի Քյանան Գեյբաթովին: Եզրափակիչում նա այսօր կմրցի մակեդոնացի Բեսիր Ալիլիի հետ:
51 կգ քաշային Մանվել Խնձրցյանը կիսաեզրափակիչ մրցամարտում 3-2 հաշվով հաղթել է Ռուսաստանը ներկայացնող հայազգի ըմբիշ Սամվել Թերզյանին: Եզրափակիչում նրա մրցակիցը կլինի թուրք ըմբիշ Ադեմ Բուրակ Ուզունը:
Մեր մյուս երեք ըմբիշները՝ Մեժլում Մեժլումյանը (60 կգ), Համլետ Հախվերդյանը (71 կգ) եւ Սերգեյ Սարգսյանը (92 կգ) պարտություն են կրել որակավորման փուլում եւ դուրս մնացել հետագա պայքարից:
Այսօր տեղի կունենան մնացած հինգ քաշային կարգերի նախնական մրցամարտերը:
