Բերման ենթարկվեցին Դավիթ Սանասարյանն ու Անդրիաս Ղուկասյանը (տեսանյութ)
Քիչ առաջ Ազատության հրապարակից բերման ենթարկվեցին Դավիթ Սանասարյանն ու Անդրիաս Ղուկասյանը: Ոստիկանները բռնի ուժով նստեցրին նրանց մեքենան ու տարան անհայտ ուղղությամբ: «Ա1+»-ի թղթակցի փոխանցմամբ՝ Դավիթ Սանասարյանը բղավում էր. «Չեմ գալիս»,- սակայն ոստիկանները ոլորեցին նրա ձեռքերը եւ նստեցրին մեքենան: Ազատության հրապարակում են նաեւ «Ժառանգության» անդամներ Արմեն Մարտիրոսյանը եւ Զարուհի Փոստանջյանը : Նրանք բղավում էին. «Ո՞ւր եք տանում, մի տարեք»: Զարուհի Փոստանջյանը վեճի բռնվեց ոստիկաններից մեկի հետ: Նա կանգնել էր ոստիկանական մեքենայի դիմաց եւ թույլ չէր տալիս, որ մեքենան շարժվի՝ ասելով, թե այդպես է անում, որ չգնան եւ այլ անձանց բերման չենթարկեն: Սակայն պատգամավորին մի կողմ հրեցին եւ մեքենան հեռացավ: Մինչեւ այդ, Ազատության հրապարակից, մոտ 2 տասնյակ ոստիկաններ, բռնի ուժով, մեքենա են նստեցրել եւս 4 քաղաքացու՝ 3 կին, 1 տղամարդ: Զարուհի Փոստանջյանը «Ա1+»-ի հետ զրույցում ասել է, որ «Ժառանգության» գրասենյակից բերման են ենթարկել նաև պահակին։