Ազատամարտիկը բանտում է, իսկ տունը՝ գրավի տակ
Նորք Մարաշում նոյեմբերի 25-ին վնասազերծված Արթուր Վարդանյանի գործով կալանավորված Աղասի Մարտիրոսյանի պաշտպանն այսօր միջնորդություն է ներկայացրել ԱԱԾ՝ իր պաշտպանյալի նկատմամբ քրեական հետապնդումը դադարեցնելու եւ նրան ազատ արձակելու վերաբերյալ: Այս մասին «Ա1+»-ին հայտնեց Աղասի Մարտիրոսյանի պաշտպան Լիանա Բալյանը: Նրա խոսքերով՝ որեւէ հիմք չկա նրան կալանքի տակ պահելու համար եւ անհապաղ պետք է ազատ արձակել: Սակայն նախաքննական մարմինը կալանքի ժամկետը երկարացնելու համար միջնորդություն կներկայացնի, թե՝ ոչ, պարզ կդառնա ապրիլի 11-ին: Հիշեցնենք, որ ԱԱԾ քննչական վարչության պետի առաջին տեղակալ Միքայել Համբարձումյանը լրագրողների հետ հանդիպման ժամանակ նշել էր, որ նախաքննական մարմինը դատարանում չի առարկի, եթե գործով կալանավորված 4 անձանց՝ այդ թվում նաեւ Աղասի Մարտիրոսյանի խափանման միջոցը փոխարինվի գրավով: Սակայն Աղասի Մարտիրոսյանը հնարավորություն չունի գրավ կիրառելու համար: Նա 18,500 դոլար վարկ ունի վերցրած, որն ամսեկան ավելանում է 500 դոլարով՝ չհաշված տույժերն ու տուգանքները: Ազատամարտիկը նաեւ 25 օր հացադուլ էր հայտարարել՝ պահանջելով չոտնահարել իր իրավունքներն ու դադարեցնել անօրինական նախաքննությունը:
