Այսուհետ արխիվից կարելի է օգտվել օնլայն՝ վճարում կատարելով (տեսանյութ)
Ազգային արխիվի տնօրեն Ամատունի Վիրաբյանը այսօր հայտարարեց, որ աշխատանքի եւ սոցիալական հարցերի նախարարության հետ պատրաստվում են նոր ծրագիր իրականացնել։ «Քաղաքացին տեղեկություն ստանալու համար այլեւս չպետք է գա, հասնի արխիվ, նա կարող է մեզ դիմել էլեկտրոնային միջոցով, ասենք՝ թոշակի համար: Մենք մեծ ծրագիր ենք իրականացնում՝ արխիվային փաստաթղթերի արխիվացում: Սրա նպատակն այն է, որ քաղաքացին կարողանա Գերմանիայից, Մոսկվայից, հարեւան Վրաստանից դիմել եւ ստանալ իրեն հետաքրքրող տեղեկությունը՝ բնականաբար այդ ծառայության համար համապատասխան վարձավճար մուծելով»,-նշեց Վիրաբյանը՝ հավելելով, որ այդ գումարներն ուղղելու են արխիվի աշխատանքը կատարելագործելուն: Ամատունի Վիրաբյանն ընդամենը երկու խնդիր է առանձնացնում՝ աշխատակիցների ցածր աշխատավարձն ու արխիվային տարածքների վերանորոգումը. «2001 թվականին, երբ ես նշանակվեցի արխիվի տնօրեն, աշխատավարձը 10 հազար դրամ էր, սակայն ես կարողացա այդ թիվը հասցնել մինչեւ 100-120 հազար դրամի, բայց դա էլ քիչ է» ,-այսօր լրագրողների հետ հանդիպման ժամանակ հայտարարեց նա: Վիրաբյանի խոսքով՝ այսօր արխիվը տարածքի խնդիր չունի, խնդիրը միայն դրանց ոչ բարվոք վիճակն է:
