«Արա Աբրահամյանին դաբռո չեն տվել» (տեսանյութ)
Քաղաքական տեխնոլոգ Վիգեն Հակոբյանը եւ տեղեկատվական անվտանգության փորձագետ Տիգրան Քոչարյանն այսօր լրագրողների հետ հանդիպման ժամանակ խոսեցին ընտրական նոր օրենսգրքի, առաջիկա ընտրությունների ու ներքաղաքական իրավիճակի մասին: Վիգեն Հակոբյանի խոսքով՝ քաղաքական դաշտն այս պահին նախընտրական փուլում է: «Սկսած սահմանադրական հանրաքվեից ՝ 2017 թվականի խորհրդարանական ընտրություններին նախապատրաստումը մեկնարկել է: Դրա վառ ապացույցն է ՀՀԿ-ՀՅԴ հուշագիրը, իսկ ընդդիմության շրջանում նոր քաղաքական ուժերի ձեւավորումը»,-նշեց նա՝ հավելելով, որ Հայաստանում սկսվել է նաեւ պրոռուսական երկրորդ բեւեռի ձեւավորումը: Քաղտեխնոլոգը հնարավոր է համարում այս առումով Արա Աբրահամյանի եւ Արթուր Բաղդասարյանի համագործակցությունը: Տիգրան Քոչարյանը, սակայն, կարծում է, որ Արա Աբրահամյանը դեռ չի կողմնորոշվել, թե որ կուսակցության հետ է դաշինք կազմելու. «Ո’չ Հայաստանից են դաբռո տվել, ո’չ էլ Ռուսաստանից, այդ իսկ պատճառով նա պարբերաբար թայմ աութ է վերցնում, որպեսզի հասկանա, թե ինչ անի»,-ասաց Քոչարյանը՝ նշելով, որ պետք չէ նաեւ բացառել Աբրահամյանի համագործակցությունը ԲՀԿ-ի հետ: ««Բարգավաճ Հայաստանում» հետաքրքիր գործընթացներ են գնում, զտվում է, եւ կարծում եմ, որ խորհրդարանական ընտրություններին նրանք կներկայանան կոալիցիայով կամ նոր հովանավորով»: Ըստ Տիգրան Քոչարյանի՝ ամենահետաքրքիր ՏԻՄ ընտրությունները սպասվում են Հրազդանում եւ Գյումրիում. «Հրազդանում հետաքրքիր գործընթաց է լինելու: Առաջին անգամ «Քաղաքացիական պայմանագիրը» լուրջ պայքարի մեջ է մտնելու լուրջ թեկնածուով: Սակայն ավելի հետաքրքիր կլինի Գյումրիում: Այն համարվում է ամենաըմբոստ քաղաքը, եւ Գյումրիում շատ բան է որոշվելու ապագա խորհրդարանական ընտրությունների հարցում»,-ասաց նա: Պատասխանելով հարցին, թե նոր օրենսգիրքը ինչ կփոխի առաջիկա ընտրություններում, Տիգրան Քոչարյանն ասաց. «Հայաստանում ինչ ընտրական օրենսգիրք էլ ընդունեն, միեւնույն է, ընտրությունները նույն սցենարով են գնալու: Ինչ էլ գրեն, միեւնույն է, օրենքը ստեղծվում է նրա համար, որպեսզի այն շրջանցվի»: