Ծանրոցը ստանալուց հետո՝ ուղիղ բանտ (տեսանյութ)
63-ամյա Ժորա Ոսկանյանը կարող է դատապարտել 15 տարվա ազատազրկման։ Ֆրանսիայից նրա զոքանչի անունով ծանրոց է ուղարկվել։ 2013-ի նոյեմբերի 27-ին այն ստանալու է գնացել Ժորայի կինը՝ Անժելա Իգիթյանը, որը ժամեր անց ձերբակալվել է։ Պարզվել է՝ ծանրոցում կա 300 հաբ սուբոտեքս տեսակի հոգեմետ դեղամիջոց, որը Հայաստանում թմրամիջոց է համարվում։ Կնոջը փրկելու համար՝ Ժորա Ոսկանյանը ներկայացել է թմրամիջոցների հասցեատեր։ «Ստիպել են, որ Ժորա Ոսկանյանը այդ դեղահաբերը վերցնի իր վրա, և հայտնի որ դա իրեն է պատկանում, և իր համար է ուղարկված և դրա դիմաց խոստացել են, որ Անժելա Իգիթյանին բաց են թողելու»: Ժորա Ոսկանյանի բարեկամները կարծում են, որ առաջադրված մեղադրանքը շինծու է։ Բարեկամուհին չի բացառում, որ Ժորա Ոսկանյանի՝ նախկինում դատապարտված լինելն է պատճառ դարձել նման մեղադրանքի։ «Հայաստանում բանտից ով դուրս է գալիս իր հետևից գնում են, ինչ-որ չփակված գործեր որ ունեն՝ անպայման փակեն, նման ստորությո՞ւն, դա պետք է կանխվի»,- ասում է Սիլվի Բարկովան: Կոտայքի մարզի ընդհանուր իրավասության դատարանում փաստաբան Էրիկ Բեգլարյանը միջնորդեց դատարան բերել ծանրոցը ուղարկած Արամ Նազարյանին, որը ներկայումս «Նուբարաշեն» Քրեակատարողական հիմնարկում է: «Իմ կարծիքով ինքը ասելու է ճիշտը, իմ կարծիքով՝ ճիշտն այն է, որ նման բան չի եղել, գտնում եմ, որ դա գործով չի ապացուցվել, այս մեղադրանքները միայն և միայն ենթադրությունների հիման վրա է կազմված»,- նշում է փաստաբան Էրիկ Բեգլարյանը: Միջնորդությունը բավարարվեց։ Հաջորդ դատական տեղի կունենա նոյեմբերի 6-ին: Ի դեպ, Ժորայի կինը՝ Անժելա Իգիթյանը դատական ծախսերի համար գումար հայթայթելու նպատակով մեկնել է արտագնա աշխատանքի։