Ձերբակալվել են «Մարտական եղբայրության» անդամներ՝ ապօրինի զենք-զինամթերք պահելու կասկածանքով
Աջակցիր «Ա1+»-ինՁերբակալվել են «Մարտական եղբայրության» անդամներ, հայտնում է միաբանության ֆեյսբուքյան էջը՝ նշելով, որ որպես բերման ենթարկելու հիմնավորում ներկայացվել է ապօրինի զենք- զինամթերք կրելու կասկածանքը։
Ոստիկանությունից «Ազատության»-ը փոխանցել են, որ ապօրինի զենք-զինամթերք կրելու և պահելու կասկածանքով 24 անձ ձերբակալվել և տեղափոխվել է ՆԳՆ ոստիկանության տարածքային ստորաբաժանումներ:
«Մարտական եղբայրությունից» պնդում են նաև, որ անդամներից ոմանց, այդ թվում՝ միաբանության ղեկավար Հրանտ Տեր-Աբրահամյանի հետ կապն ընդհատվել է։ «Ազատության»-ը ևս չի հաջողվել կապ հաստատել Տեր-Աբրահամյանի հետ։
Այսօր կեսօրին նախատեսված էր նրանց այցը Վերին Ոսկեպար, իրենց ներկայացմամբ, մարտավարական պարապմունքների։ Երեկ, սակայն, կառույցից հայտնել էին, որ «գրասենյակ էին այցելել Հայաստանի Քրեական ոստիկանության ներկայացուցիչները», հորդորել ձեռնպահ մնալ այս նախաձեռնությունից։ Մինչդեռ, ըստ Հրանտ Տեր-Աբրահամյանի ֆեյսբուքյան գրառման՝ նրանք ամեն դեպքում որոշել էին կատարել այցը։
