5 հիվանդ' նույն ընտանիքից (տեսանյութ)
Աջակցիր «Ա1+»-ին«Ես եկա այն համոզման, որ սա նույն սովորական գրիպն է, նույն ձեւով է տարածվում: Այստեղ ոչ մի զարմանալի բան չկա, ամեն տարի էլ գրիպ է եղել: Մինչդեռ, հիմա մենք եւ դուք'լրագրողներդ, շիկացնում ենք իրավիճակը, մարդիկ էլ խուճապահար նետվում են դեղատներ»,- «Ա1+»-ի հետ զրույցում ասաց ՀՀ գլխավոր համաճարակաբան Արա Ասոյանը:
Այսօր հայտնի է դարձել խոզի գրիպով վարակման 5 նոր կասկածելի դեպքերի մասին: Վարակվածները, Արա Ասոյանի տեղեկացմամբ' Հայաստանի քաղաքացիներ են, նույն ընտանիքի անդամներ:
«Ընտանիքի անդամներից մեկը ժամանել է արտերկրից եւ վարակել մյուսներին: Հիվանդները անմիջապես տեղափոխվել են Նորքի ինֆեկցիոն հիվանդանոց եւ հիմա հետազոտվում են»,-«Ա1+»-ին ասաց Արա Ասոյանը:
Գլխավոր համաճարակաբանը համոզված է'հիվանդների թիվը դեռ կաճի, սակայն խորհուրդ տվեց խուճապի չմատնվել:
«Խնդրում եմ, օգնեք, որ մարդիկ խուճապի մեջ չընկնեն: Հո երկիրը չենք կաթվածահարելու՞: Այսօր զանգվածային փսիխոզ է սկսվել: Գնացե'ք դեղատների մոտ կանգեք, տեսե'ք ինչ է կատարվում: Մարդիկ իրենց վերջին կոպեկն են տալիս, հաց չեն առնում, որ ախմախ բաներ առնեն դեղատներից, որտեղ գները արհեստականորեն բարձրացել են: Օգնեք, որ դա վերանա»,-«Ա1+»-ին ասաց Արա Ասոյանը:
«Կա արդյո՞ք ծրագիր հասարակական եւ տրանսպորտային որոշ վայրերում դիզինֆեկցիոն աշխատանքներ սկսելու վերաբերյալ»,-«Ա1+»-ի հարցին գլխավոր համաճարակաբանը պատասխանեց. «Սա օդակաթիլային ինֆեկցիա է եւ դրա դեմ ծրագիր մշակելը մի քիչ դժվար է, մի քիչ խաբեություն եւ մի քիչ էլ բիզնես: Դրանից հարյուր տոկոսով հնարավոր չէ պաշտպանվել, սակայն եթե զգանք,որ կարիք կա' կանենք: Առայժմ նման խնդիր չունենք»:
Հայաստանում A\H1N1 -ով 11 վարակվածներից 2-ը Իրանի քաղաքացիներ են, 1-ը՝ Թուրքիայի, մյուսները' Հայաստանի: Հիվանդներից 3-ն արդեն դուրս են գրվել հիվանդանոցից, մյուսները ստանում են ստացիոնար բուժում: Նրանց տրամադրվում է նաեւ իմունային համակարգը բարձրացնող դեղամիջոցներ:
Դիմակների գները բարձրացել են եռակի
«Խոզագրիպի» դեմ պայքարի ամենաարդյունավետ դեղամիջոցը համարվում է «Տամիֆլյու»- ն, 4000 դրամից այն հասել է 18 .000 դրամի/ : Ի դեպ, այն պետք է օգտագործվի միայն վարակի դեպքում:
«Ա1+»-ը որոշեց շրջայց կատարել կենտրոնի մի շարք դեղատներում: «Երեւան» կինոթատրոնի շենքում գործող դեղատանը տեղեկացրեցին, որ «Տամիֆլյու» վաղուց չունեն: Երեք օր է' ինչ վերջացել են նաեւ պաշտպանիչ դիմակները: Այստեղ վաճառողները կրում էին բժշկական դիմակներ:
«Պարզապես մարդիկ չեն ենթադրել, որ դիմակները դեղատներից կվերջանա»,-«Ա1+»-ի հետ զրույցում ասաց դեղատան դեղագետ Օֆիկ Խասրաֆյանը: Նա նաեւ տեղեկացեց, որ իրենք մեկ դիմակը վաճառել են 60 դրամով: Մինչդեռ , ինչպես պարզվեց մեր շուրջայցի ընթացքում, մյուս բոլոր դեղատներում դիմակների գները 150-200 դրամ էին: Ի դեպ, մի դիմակը կարելի է կրել ընդամենը 2 ժամ:
«Մեր դեղատներում խուճապային իրավիճակ չկա, ամեն ինչ ընթանում է նորմալ: Ունեք մեծ քանակությամբ դիմակներ, օրական վաճառում ենք 100-150 հատ: Վերջին երեք օրերի ընթացում դրանց գները իհարկե, բարձրացել են եւ մոտ 100 դրամից դարձել 200 դրամ»,-«Ա1+»-ին ասաց «Լավանդա» դեղատան դեղագործ Պայծառ Նազարյանը:
Իսկ ինչո՞վ է դա պայմանավորված' հարցին պատասխանեց «Լավանդա Հոլդինգի» տնօրեն Գրիգոր Կադարյանը. «Մենք գները արհեստականորեն չենք բարձրացնում, այլ դրանք համաձայնեցնում ենք մատակարարների հետ: Թանկացումը, կարծում եմ, պայմանավորված է ընդհանուր շուկայի պահանջարկի հետ»:
Դպրոցականները զգուշացվել են
Թե' սննդի կետերում, թե' հասարակական առեւտրի վայրերում առայժմ ՀՀ քաղաքացիների մեծ մասը շրջում էին առանց պաշտպանիչ դիմակների:
«Կարծում եմ, վարակը այն աստիճանի տարածված չէ, որ հարկ լինի դիմակներով ման գալ»,-«Ա1+»-ին ասաց երեւանաբնակ Լիանա Գալստյանը: Մինչդեռ, կանխարգելիչ միջոցառումեր են կիրառվել մի շարք դպրոցներում: Դպրոցական Դավիթ Անդրեասյանը, որին դիմակով հանդիպեցինք փողոցում, ասաց, որ իրեն հորդորել են այն կրել դպրոցական բժիշկն ու ծնողները:
«Պաշտպանվում եմ խոզի գրիպից: Ընկերներիս հետ դեղատնից գնել ենք դիմակներ: Ես օրական կրում եմ երկու հատ դիմակ' 4 ական ժամով»,-ասաց նա:
