Բացել լրահոսը Փակել լրահոսը
A A

ՀՅԴ-ն պատրաստ է նաեւ ՀԱԿ-ի հետ համագործակցել

Հարցազրույց

«Ա1+»-ի հյուրասենյակում է Երեւանի քաղաքապետի ՀՅԴ թեկնածու Արծվիկ Մինասյանը:

 -Արդեն մեկ ամիս է, ինչ Հայ Հեղափոխական Դաշնակցությունը հայտարարեց կոալիցիայից դուրս գալու մասին: Ի՞նչ է փոխվել այս ընթացքում ձեր կուսակցության եւ հատկապես ձեր կյանքում:

-Մեծ հաշվով շատ բան չի փոխվել, բայց մեր կեցվածքը կառավարության հանդեպ դարձել է ավելի անզիջող, ավելի հստակ: Այն, որ մենք դուրս ենք եկել քաղաքական կոալիցիայից արտաքին հարաբերությունների պատճառով, դա չի նշանակում, որ մենք ընդդիմություն ենք միայն այդ ոլորտում: Եվ ներքին կյանքում, հետեւաբար նաեւ սոցիալ-տնտեսական մասով մենք ավելի հստակ եւ կոշտ ենք սկսել ներկայացնել մեր դիրքորոշումը մասնավորապես նույն կառավարության ծրագրերի վերաբերյալ:

- Այս մեկ ամսվա ընթացքում կարծես թե շատ բան չի փոխվել կառավարության ծրագրերում: Այսինքն, ինչո՞ւ մինչեւ այդ դուք չէինք դրսեւորվում այդքան սուր:

-Ամբողջ խնդիրն այն է, որ այս մեկ ամսվա ընթացքում ԱԺ-ում մասնավորապես ներկայացվեցին օրինագծեր, որոնք ուղղակի հակասում են մինչ այդ հակաճգնաժամային քաղաքականության այն ծրագրային մոտեցումներին, որոնք հայտարարեց վարչապետը: Մասնավորապես, հարկային փաթեթը, որ բերվեց եւ փորձ էր արվում անցկացնել խոշոր բիզնեսի նկատմամբ' իբրեւ թե ճնշում գործադրելու կամ օրինական դաշտ բերելու նպատակով: Բայց ամբողջ իմաստը հարկային այս օրենսդրության' բյուջե լցնելն է, բայց բյուջե լցնելը միջոց է, ոչ թե նպատակ, այս փիլիսոփայությունն է խախտվում ի սկզբանե:

 -Դուք հայտարարում եք կոռուպցիայի դեմ պայքարի անհրաժեշտության մասին, բայց ավանդաբար ամենակոռումպացված համակարգերը եղել են առողջապահությանն եւ կրթականը, որոնք տարիներ շարունակ ղեկավարել է դաշնակցությունը: Ի՞նչն էր խանգարում ձեզ այսքան տարի պայքարել եւ արմատախիլ անել կոռուպցիան:

-Իսկապես կոռուպցիան համակարգային երեւույթ է եւ եթե ամբողջ պետական կառավարման համակարգում այս որդը տարածված է, չի կարող մի մասում ընդհանրապես չլինել: Կարող է լինել քիչ, բայց ընդհանրապես բացառել հնարավոր չէր: Հնարավոր չէ մաքրել ամեն ինչը, եթե չունենաս քաղաքական կամք: Եթե հանրապետության նախագահի մակարդակով այդ կամքը դրսեւորվի, անպայման այն էական ազդեցություն կունենա եւ քանի որ քաղաքապետը ընտրովի է եւ քաղաքապետի անձից կախված է շատ բան, այդ կամքը դրսեւորելու է նա: Եթե լինի անձ, ով իսկապես այդպիսի կամք կդրսեւորի, ես վստահ եմ թե դպրոցներում, թե քաղաքապետարաններում, թե թաղապետարաններում, թե սոցիալական ծառայություններում ու քաղաքապետարանի ենթակա բոլոր կառույցներում ոչ միայն էականորեն կարող է կրճատվել, այլ առանձին դեպքերում կարող է իսպառ վերացվել այն:

-Դուք այսօր քննադատում եք այն, ինչ առնվազն 10 տարի արվում է ձեր աչքի առաջ կոալիցիայի անդամ լիենելու եւ պատասխանատվություն կրելու պարագայում: Ինչո՞ւ ժամանակին դրա դեմ չէիք ըմբոստանում: Չէ ո՞ր, ասենք, ծառահատումներն ու ապօրինի շինությունները այս մեկ ամսվա ընթացքում չէ, որ իրականացվել են:

- Մենք խորհրդարանում հարցադրումներ, կոնկրետ փաստեր եւ դրանց համապատասխան կոնկրետ պահանջներ ներկայացրել ենք: Բայց այլ բան է, երբ դու կարողանում ես ազդել գործընթացի վրա ուղղակիորեն, այլ բան է, երբ անուղղակիորեն ես փորձում ճնշում գործադրել: Մենք լինելով նախորդ կոալիցիայի մեջ' 10 տարիների ընթացքում իսկապես փորձեցինք, սակայն ոչինչ չհաջողվեց: Հիմա մենք հույս ունենք, որ ընդդիմադիր դաշտում մեր ձեռքերը ավելի ազատ վիճակում կլինեն, եւ շատ ավելի համախմբված ձեւով, նաեւ շատ այլ ուժերի հետ, ինչպիսին է օրինակ «Ժառանգությունը»  եւ հայրենասիրական այլ ուժեր, կկարողանանք միավորվել եւ համակարգային լուծումներ տալ այս ամենին:

- Ընդհանրապես, արդյո՞ք ճիշտ չէր լինի մնալ իշխանության մեջ եւ բռնել այն ձեռքը, որը ուզում  է ազգային կամ պետական շահին հակասող հայտարարություններ ստորագրել, քաղաքականություն վարել:

-Ամբողջ ցավը հենց այն է, որ մենք փորձ անելով կոալիցիայի մեջ մնալ եւ ստորագրելով 22 առաջնահերթությունների տակ' փորձեցինք այդ մեխանիզմները առավել ամբողջական դարձնել: Նախորդ անգամ չկար ամբողջական պատասխանատվության ինստիտուտը: 2008թ մարտի 21-ի կոալիցիոն հուշագրով նշված էր ամբողջական պատասխանատվությունը եւ մեխանիզմները, թե ինչպես դա պետք է իրագործվի, սակայն այդ հուշագիրը խախտվեց: Խախտվեց կոալիցիոն մյուս գործընկերների կողմից եւ մենք իբրեւ քաղաքակիրթ քաղաքական ուժ, խզեցինք մեր կապը նրանց հետ եւ դուրս եկանք կոալիցիայից: Մեր խնդիրն է ոչ թե թողել իշխանությունը սխալվի, հետո հարվածել, այլ թույլ չտալ, որպեսզի իշխանությունը չսխալվի, հատկապես ազգային հարցերում:

- Դուք հայտարարում եք, որ ընդդիմություն եք, ինչու ձեր ընդդիմությանը չեն նեղում. դաշնակցական գործիչներին չեն ձերբակալում, բիզնեսը դաշնակցականների ձեռքից չեն խլում, հանրահավաքները չեն խոչընդոտում: Սրանք են մեր երկրում ընդդիմություն լինելու իրական հետեւանքները:

-Ես ցավում եմ, որ մեզ մոտ ընդդիմությունը միշտ ընկալվել է հալածյալի կարգավիճակով: Մենք պետք է կարողանանք նաեւ քաղաքակիրթ մշակույթ այս ոլորտ բերել, բայց այն որ բացարձակ հալածանք կամ ճմշում չկա մեր նկատմամբ, այդպես չէ, քարոզարշավը պարզ վկայությունն է այն բանի, որ շատ լրատվամիջոցներ պարզապես իրենց տեղեկատվական համակարգերը փակել են մեզ համար, թույլ չեն տալիս եթեր դուրս գանք, կամ առնվազն լուրերը չեն մեկնաբանում: Բայց դրանից պետք չէ հուսահատվել, ձերբակալությունը չէ, որ ընդդիմության կեցվածք պետք է ցույց տա, կարեւորը ճշմարիտ, արդարամիտ խոսքն է:

-Հավատո՞ւմ եք արդար ընտրություններին:

Ես հավատում եմ իմ կամքին, կուսակցության կամքին եւ հավատում եմ այն ձգտմանը, որ մենք կարող ենք կազմակերպել, եւ սա է հիմնական խնդիրներից մեկը: Մյուս բոլոր քաղաքական ուժերը, ովքեր հայտարարում են, որ արդարության կողմն են, թող գոնե մեկ անգամ, առաջին անգամ մայրաքաղաք Երեւանում արդար ընտրություն ապահովեն: Այդ դեպքում, անկախ նրանից' ով կընտրվի, վստահ եմ, որ մյուս ուժերը կշնորհավորեն, դաշնակցությունը իր դրական վերաբերմունքը ցույց կտա եւ այն անձը, որը այսպիսի ընտրություններով գա իշխանությունը, կլինի ավելի ուժեղ եւ ավելի կամքով հարուստ: Պատրաստ ենք համագործակցության ցանկացած ուժի հետ, ով կուզենա մասնակցել արդար ընտրությունների կազմակերպմանը, այդ թվում նաեւ ՀԱԿ-ի:

-Խորհրդարանում հայտարարեցիք, որ «գլխավոր հավաքարարի» պաշտոնի ընտրության է պատրաստվում իշխանությունը: Ընդդիմության համար սա սահմանադրական կարգը վերականգնելու ճանապարհ է, ձեզ համար ի՞նչ է նշանակում քաղաքապետի ընտրությունը :

-Ինձ համար սա ազգային պետական քաղաքական գործիչ ընտրելու, քաղաքապետարան ձեւավորելու քաղաքական ինքնություն է, որտեղ պետք է ձեւավորվի նաեւ կառավարման նոր մշակում, նոր մոդել, ինչը կարող է իրական հակակշիռ ու զսպման համակարգ դառնալ կենտրոնական իշխանություններին նաեւ իր դրական ազդեցությամբ ազդի Հայաստանի ներկայիս սահմաններից դուրս' ինչպիսին Ջավախքն է, Արցախն է եւ հայաշատ այլ բնակավայրեր:

Զրուցեց Դիանա Մարկոսյանը