«Ալաշկերտը» երկու օր առաջ կմեկնի Գլազգո
Երեւանի «Ալաշկերտի» հիմնադիր նախագահ եւ հովանավոր Բագրատ Նավոյանի նախաձեռնությամբ արդեն այս գիշեր թիմը կմեկնի Գլազգո, որտեղ կանցկացնի ՈՒԵՖԱ-ի չեմպիոնների լիգայի որակավորման առաջին փուլի պատասխան հանդիպումը տեղի «Սելթիկի» հետ: Այդ մասին տեղեկացնում է ֆուտբոլային ակումբի մամուլի ծառայությունը: «Ալաշկերտը» Շոտլանդիա կմեկնի Երեւան – Դուբայ - Գլազգո չվերթով եւ կհանգրվանի Jurys Inn Glasgow հյուրանոցում: Թիմը շուտ է մեկնում մրցավայր, որպեսզի խաղին պատշաճ կերպով կարողանա նախապատրաստվել «Ալաշկերտը» երկու մարզում կանցկացնի Գլազգոյում: Առաջինը կկայանա հուլիսի 16-ին, իսկ նախախաղային մարզումը` հուլիսի 17-ին` «Սելթիկ Պարկ» մարզադաշտում: «Սելթիկ» - «Ալաշկերտ» պատասխան հանդիպումը կկայանա հուլիսի 18-ին, նույն «Սելթիկ Պարկ» մարզադաշտում եւ կմեկնարկի Երեւանի ժամանակով 22:45-ին: Հիշեցնենք, որ Երեւանում կայացած թիմերի առաջին հանդիպումն ավարտվել է շոտլանդական ակումբի վստահ հաղթանակով՝ 3:0:
