Վախճանվել է կինոռեժիսոր Ստանիսլավ Գովորուխինը

Ծանր և երկարատև հիվանդությունից հետո Բորվիխա առողջարանում 83 տարեկան հասակում մահացել է  կինոռեժիսոր, Ռուսաստանի պետդումայի պատգամավոր Ստանիսլավ Գովորուխինը:

Նրա մահվան լուրը հայտնել է ՌԴ Պետդումայի ստորին պալատի խոսնակ Վյաչեսլավ Վոլոդինը։

Այս մասին տեղեկանում ենք ԲԲՍ-ից։

Ստանիսլավ Գովորուխինը ականավոր խորհրդային ռեժիսոր է, հենց խորհրդային, քանի որ վերջին երեսուն տարիներին նա ամբողջովին նվիրվել էր քաղաքականությանը: Նրա վերջին ֆիլմը, որը լայն քննարկումների արժանացավ, «Վորոշիլովյան հրաձիգն» էր (1999): Իսկ Գովորուխինի «Հանդիպման վայրը փոխել չի կարելի»-ն (1979) շատ փորձագետներ և հանդիսատեսներ համարում են խորհրդային կինոյի լավագույն դետեկտիվը:

Ընդհանուր առմամբ՝ ռեժիսորը նկարահանել է 23 ֆիլմ, գրել 22 սցենար, այդ թվում՝ խորհրդային և ռուսական կինոյի ամենաեկամտաբեր մարտաֆիլմինը՝ «XX դարի ծովահենները», ունեցել է 18 դերակատարում: