Երևանի ամենափոշոտ համայնքներն են Կենտրոնն ու Շենգավիթը (տեսանյութ)
Երեւանում օդի աղտոտվածության ցուցանիշները արձանագրվում են հնամաշ սարքերով։ Հայէկոմոնիտորինգը միակն է Հայաստանում, որ իրականացնում է ամենօրյա մթնոլորտային օդի մոնիտորինգ: Շրջակա միջավայրի մոնիթորինգի եւ տեղեկատվության կենտրոն ՊՈԱԿ-ի փոխտնօրեն Գայանե Շահնազարյանը նշում է. «Ծծմբի երկօքիսդը, ազոտի երկօքսիդը, փոշին ՝դրանք պետք է բացառել, նրանցից որեւէ մեկի ավելացումը նշանակում է, որ կա խնդիր»: Վերջին անգամ դիտակայանները վերազինվել են 2008-ին: «Այսօր, երբ ամեն ինչ թվայնացվում է, մենք հետ ենք մնացել: Ամբողջ ցանցը կարիք ունի վերազինման, որ կարողանանք, ոչ թե 3 օր հետո իրազեկել, այլ օնլայն՝ հենց այս պահին»: Երեւանում օդի մոնիտորինգի 5 ստացիոնար դիտակայան կա, շարժական դիտակետերի թիվը 45 է: «Շարժական դիտակայանում երկու պարամետրի դիտարկում ենք անում, բայց փոշու դիտարկումն իրականացնում ենք միայն 5 դիտակայանում, դա էլ ամբողջ քաղաքի պատկերը տեսնելու հնարավորություն չի տալիս»: Երեւանում՝ այս տարվա առաջին եռամսյակում ածխածնի մոնօքսիդը, ծծմբի երկօքսիդը, գետնամերձ օզոնը չեն գերազանցել սահմանային թույլատրելի կոնցենտրացիաները: Փոխարենը բարձր փոշու ծանրաբեռնվածության մակարդակը: «Այս պահին գերազանցումներ ունենք Կենտրոն եւ Շենգավիթ համայնքներում: Նոր Նորքում օդն ամենամաքուրն է»: ՀՀ խոշոր քաղաքներում եւս իրականացվում են դիտարկումներ, բայց որոշակի սահմանափակումներով: «Այլ հարց է, թե ինչ պարամետրեր ենք դիտարկում, այն ինչ անում ենք Երեւանում չենք կարողանում անել մարզերում: Ֆինանսական ներդրման պարագայում կկարողանանք ավելի շատ ինֆորմացիա հաղորդել»: Ամենաաղտոտված օդը Ալավերդիում է, ամենամաքուրը՝ Ծաղկաձորում: Հենց այստեղ է, որ օդի որակը համապատասխանում է չափանիշներին: