Հանրակացարանի բնակիչները հրավիրում են փոխքաղաքապետին իրենց սանհանգույցից օգտվելու (տեսանյութ)
Երեւանի քաղաքապետարանն անակնկալի է բերել նախկին նուրբ-բրդյա գործվածքների կոմբինատի՝ Կամվոլնի գործարանի հանրակացարանի շենքի բնակիչներին։ Նրանք հասկացել են, որ այլեւս նոր բնակարանի հույս չունեն։ 2017-ի փետրվարին Գ. Նժդեհի փողոցի 56ա շենքը, որտեղ բնակվում է 800 հոգի՝ ճանաչվել էր 4-րդ կարգի վթարային։ Ըստ եզրահանգման այն ենթակա էր քանդման, բայց նույն թվականի հոկտեմբերին բնակիչների համար անհասկանալի պատճառներով շենքի կարգավիճակը փոխվել է եւ տրվել է 3-րդ կարգի վթարայնության աստիճան, ինչը ենթադրում է ամրացման աշխատանքներ։ Թեեւ որոշումներն ընդունվել են նախորդ տարի, այնուամենայնիվ բնակիչները սկսել են անհանգստանալ միայն օրերս, երբ շինարարները եկել ու կողպել են նկուղի դուռը՝ ամրացման աշխատանքները նկուղից են սկսելու: Բնակիչներն էլ իրենց հերթին են նոր կողպեք դրել նկուղի դռանը՝ խոչընդոտելով շինարարների աշխատանքը: Եվա Աբրահամյանի 5 հոգանոց ընտանիքն ապրում է 16 քառ մետր մակերես ունեցող սենյակում: «Առաստաղը պոկվեց ու թափվեց երեխայի օրորոցի վրա: Հնարավո՞ր է այս պայմաններում ապրել: Ես հնարավորություն չունեմ տանը սանհանգույց սարքել, ընդհանուր սանհանգույցից ենք օգտվում»: Նարինե Միրզոյանը իր 7 երեխային մեծացրել է մի սենյակում, որտեղ միայն մահճակալների համար տեղ կա: «Երեխաներս մեծացել են, բանակից տղաներս եկել են ու քույրերի հետ մի սենյակում են քնում»: Բնակիչների բազմաթիվ բողոքներ անպատասխան են մնացել: «Դիմել ենք քաղաքապետարանի Վահե Նիկոյանին, ասում է էլիտար շենք է, թող ապրեմ: Ես իրեն հրավիրում եմ մեր տուն սուրճ խմելու եւ սանհագույցից օգտվելու կամ այդ օդը շնչելու»: Բնակիչները մտավախություն ունեն, որ շենքում ամրացման աշխատանքներ տանելուց հետո, այն կդարձնեն արդեն 2-րդ կարգի վթարային եւ ընդմիշտ կզրկեն նրանց բնակարան ստանալու իրավունքից: Ի դեպ, շենքի բնակիչները նամակ էին ուղարկել քաղաքապետարան եւ պատասխանատուներին այսօր հրավիրել շենքի բակ՝ հանդիպման, սակայն ոչ ոք այդպես էլ չեկավ: