A
A
Հայ մեծ բարերար Վահագն Հովնանյանն այսօր կդառնար 86 տարեկան
Այս առիթով այսօր Վահագնի բնակելի թաղամասում տեղի կունենա «Հիմնադրի օրվան» նվիրված միջոցառում, որի ամբողջ հասույթը կուղղվի Անուշ օպերայի նոր բեմադրության կյանքի կոչմանը:
Միջոցառմանը ներկա կլինեն հայտնի դիվանագիտական ներկայացուցիչներ, մշակութային գործիչներ, Վահագնի թաղամասի բնակիչներ, օպերայի սիրահարներ և բարձրաստիճան պաշտոնյաներ:
Հովնանյան Ինթերնեյշնլն աջակցում է հայկական օպերայի զարգացմանը
«Հայկական մշակույթի հետ ապրելը փառք է, որ պետք է վայելենք կյանքի ընթացքում»:
Անսահման սեր հայրենիքի հանդեպ ու ազգանվեր գործունեություն. թերևս այսպես կարելի է հակիրճ բնութագրել հայ մեծ բարերար, ազգային և հասարակական գործիչ Վահագն Հովնանյանին, ով այսօր կդառնար 86 տարեկան: Շատերս տեղյակ ենք Վահագն և Հասմիկ Հովնանյանների հայապահպանությանն ուղղված գործունեության մասին, սակայն քչերս գիտենք, թե որքան կարևոր տեղ էր զբաղեցնում մշակույթը` հատկապես երաժշտությունը, նրանց կյանքում:
Վահագն Հովնանյանը ծնվել է 1932թ.-ին, նույն տարի, ինչ Ազգային օպերային թատրոնը, ինչն այդքան էլ զուգադիպություն չէ: Կենդանության օրոք սիրում էր հատկապես Անուշ օպերան և անընդմեջ կարող էր հատվածներ կատարել սիրված ստեղծագործությունից:
Ողջունելով մեծ բարերարի ու նրա տիկնոջ սերն օպերայի հանդեպ՝ Հովնանյան Ինթերնեյշնլն աջակցում է Օպերայի և բալետի ազգային ակադեմիական թատրոնի գեղարվեստական ղեկավար, մաեստրո Կոնստանտին Օրբելյանի ջանքերին՝ ուղղված հայկական օպերայի զարգացմանը: Այս առիթով այսօր՝ փետրվարի 16-ին, Վահագնի բնակելի թաղամասում տեղի կունենա «Հիմնադրի օրվան» նվիրված միջոցառում, որի ամբողջ հասույթը կուղղվի Անուշ օպերայի նոր բեմադրության կյանքի կոչմանը: Միջոցառման ընթացքում կհնչեն հատվածներ սիրված ստեղծագործությունից. Անուշին կմարմնավորի Մերի Մովսիսյանը, իսկ Սարոյին՝ Պերճ Քիրազյանը: Վարսենիկ Ավանյանը կկատարի հատված Տրավիատայից: Միջոցառմանը ներկա կլինեն հայտնի դիվանագիտական ներկայացուցիչներ, մշակութային գործիչներ, Վահագնի թաղամասի բնակիչներ, օպերայի սիրահարներ և բարձրաստիճան պաշտոնյաներ:
Հովնանյան ամուսինները մեծապես նպաստել են Սփյուռքում հայկական ինքնության պահպանմանը, հայրենիք-Սփյուռք հարաբերությունների սերտացմանը, իսկ հայրենիքում՝ մշակույթի, զբոսաշրջության, կրթության, շինարարության և այլ ոլորտների զարգացմանը:
Վահագն Հովնանյանն իր ողջ կյանքի ընթացքում արժանացել է բազմաթիվ հոգևոր և ազգային շքանշանների և տիտղոսների, որոնցից ամենանշանավորն է «Մեծի Տանն Կիլիկիո իշխան» կոչումը:
1998թ-ին Վահագն Հովնանյանը հիմնել է Հայաստանում իր տեսակի մեջ առաջին և միակ մասնավոր բնակելի համայնքը՝ Վահագնի թաղամասը՝ նպատակ ունենալով հայրենիքում համախմբել աշխարհասփյուռ հայությանը և նպաստել համազգային ներուժի զարգացմանը: Թաղամասն այս տարի նշելու է իր հիմնադրման 20 տարին:
Հավելյալ տեղեկությունների համար դիմել Արշալոյս Ապէճեանին՝ (+374-98) 44 99 77:
