Աղջիկը Բերդից կամ խոհեր սահմանից (տեսանյութ)
Տավուշի մարզում բնակվող 9-ամյա Շուշանը հավատում է ամանորյա հրաշքին։ Բայց նրա համար հրաշագործ հերոսը բնավ էլ Ձմեռ պապը չէ։ «Ձմեռ պապիկ, այդպիսի վատ բաներ չկան»,- ասում է նա՝ պնդելով, որ նվերներ բերում է Սուրբ Նիկողայոսը։ Ընտանիքի ավագներից է Շուշանը լսել Սուրբ Նիկողայոսի բարեգործությունների մասին, եւ հասկացել, որ իրական բարեգործը նա է, որը Սուրբ Ծննդի նախօրեին օգնել է կարիքավոր մարդկանց։ 10 տարին չբոլորած աղջիկը հասցրել է այնպիսին բաների ուշադրություն դարձնել, որոնք անգամ մեծահասակները չեն նկատում։ Փոքրիկը փորձել է իր բացահայտածը հասակակիցներին ներկայացնել, բայց համոզել դեռեւս չի ստացվում։ Քարտաշյանների վեց հոգանոց ընտանիքը Մովսես գյուղում հաճախ է լինում, քանի որ ազգականներ ունեն այստեղ՝՝ ի դեմս քահանայի ընտանիքի։ Կիրակի օրերին նրանք Բերդից գալիս են Մովսես՝ պատարագներին մասնակցելու։ Աղջիկները նաեւ երգում են պատարագներին։ 7-ամյա Ալբերտ Քարտաշյանը քույրերից ետ չի մնում։ Նա նաեւ հայրենասիրական երգեր է երգում։ Սահմանին ապրող Ալբերտը խաղաղություն է մաղթում, նրա ավագ քրոջ՝ 12-ամյա Լիլյայի ցանկություններն ավելի շատ են, որոնցից մեկն էլ վերաբերում է Բերդ քաղաքին։ «Որ ցեխ չլինի մեր քաղաքում».- ասում է Լիլյան։ Մովսեսի գյուղի երեխաները խողում են եկեղեցուն հարակից տարածքում։ Շարվում են տեսախցիկի առաջ՝ խոսելու։ Բայց բոլոր հարցերին մի պատասխան են տալիս՝ գիտում չեմ։ Շուշանը համեմատություններ է անում Մովսեսի եւ Բերդի երեխաների միջեւ. Մովսեսում երեխաներն ավելի շատ են սիրում խաղալ։ Մեկ տարի առաջ է Քարտաշյանների ընտանիքը Երեւանից հաստատվել Բերդում։ Շուշանենց դասարանում 21 աշակերտ կա, կուզենար ավելին լինեին, գոնե 35-ը, ինչպես Երեւանում։ Աղջիկը կարոտում է երեւանաբնակ իր ընկերներին եւ ուզում այդ մասին նրանք իմանան։
