«Սամվել Բաբայանին ենթադրությունների հիման վրա է մեղադրանք առաջադրվել». պաշտպան (տեսանյութ)
«Արցախի հանրապետության Պաշտպանության բանակի նախկին հրամանատար Սամվել Բաբայանին ենթադրությունների հիման վրա է մեղադրանք առաջադրվել»,- այսօր դատարանում մոտ 2 ժամ տեւած ճառում նշեց պաշտպան Ավետիս Քալաշյանը: Սամվել Բաբայանը մեղադրվում է «Իգլա» տեսակի զենիթահրթիռային համալիր, ինչպես նաեւ փոխարկման արդյունքում հանցավոր ճանապարհով ստացված գույք ձեռք բերելու հոդվածներով: «Սամվել Բաբայանը որեւիցե կապ չունի այդ զենքի մասերը ձեռք բերելու հետ, դրա նախաձեռնությունը պատկանել է Սանասար Գաբրիելյանին: Այն ձեռք բերելու ոչ մի պատվեր չի տվել, դրա դիմաց էլ գումար վճարելու խոստում չի տվել»,- ասաց Ավետիս Քալաշյանը: Մեղադրանքում նշվել է, որ Սամվել Բաբայանը Սանասար Գաբրիելյանին դրդել է համապատասխան կապեր ունեցող անձանց ներգրավելու միջոցով ապօրինի կերպով ձեռք բերել «Իգլա», ինչպես նաեւ նյութապես շահագրգռել է: «Նշված հանգամանքը հաստատված համարելու համար նախաքննության մարմինը պետք է պարզեր եւ հիմնավորեր, թե կոնկրետ ինչով է արտահայտվել նյութապես շահագրգռելը: Այսինքն՝ նյութական ի՞նչ օգուտ է խոստացել Սամվել Բաբայանը Սանասար Գաբրիելյանին: Բայց խոստում տալու մասին որեւէ տվյալ առկա չէ»,- ավելացրեց փաստաբանը: Սամվել Բաբայանը, ըստ մեղադրանքի, «Իգլայի» համար պետք է վճարեր 50.000 ԱՄՆ դոլար: Արցախի Հանրապետության պաշտպանության բանակի նախկին հրամանատարի պաշտպանը միաժամանակ անհիմն որակեց Սանասար Գաբրիելյանին առաջադրված մեղադրանքը. «Նրա փաստացի կատարած գործողություններում առկա չէ ավարտված հանցակազմ, այլ տվյալ հանցակազմի փորձ: Այդ զենքի մասերը Սանասար Գաբրիելյանի մոտ չեն եղել»: Փաստաբանը դատարանում բացատրեց, որ հանցակազմն ավարտվում է այն ժամանակ , երբ անձը փաստացի ձեռք է բերում զենք կամ ռազմամթերք եւ փաստացի գտնվում է նրա տիրապետության տակ. «Գործով ապացուցված է, որ զենքի մասերը նա տեսել է ընդամենը լուսանկարով, իսկ դրանից հետո հրաժարվել է այդ զենքի մասերը ձեռք բերելուց»,- ավելացրեց փաստաբանը : Պաշտպան Ավետիս Քալաշյանը այսօր հանցակազմի բացակայության պատճառաբանությամբ միջնորդեց Սամվել Բաբայանին առաջադրված երկու մեղադրանքներում արդարացնել: Հիշեցնենք մեղադրողը միջնորդել է նրան դատապարտել 7 տարվա ազատազրկման: Իսկ Սանասար Գաբրիելյանը միջնորդեց գործում ներգրավել նոր պաշտպան: Նա իր նախկին պաշտպաններից հրաժարվել է: Դատական նիստը կշարունակվի նոյեմբերի 27-ին: