53 միլիոն՝ ԱԺ զորանոցի ու ջեռուցման համակարգի վերանորոգմանը
Օգոստոսի 31-ի կառավարության նիստում կքննարկվի ՀՀ 2017 թ. պետբյուջեում վերաբաշխում կատարելու, ՀՀ Ազգային ժողովին գումար հատկացնելու մասին առաջարկը, որը կներկայացնի Ֆինանսների նախարար Վարդան Արամյանը։ Կառավարությունն ըստ այդմ որոշում կկայացնի Հայաստանի Հանրապետության կառավարության պահուստային ֆոնդի հաշվին Հայաստանի Հանրապետության Ազգային ժողովին 2017 թվականի ինն ամսում հատկացնել 53 մլն դրամ՝ ՀՀ Ազգային ժողովի մասնաշենքում գտնվող ՀՀ պետական պահպանության ծառայության զորանոցի և ՀՀ Ազգային ժողովի շենքի ջեռուցման համակարգի ընթացիկ նորոգման աշխատանքների իրականացման համար։ Հիմնավորումներում ասվում է, որ ՀՀ ԱԺ պետական պահպանության ծառայության զորանոցը գտնվում է ծայրահեղ անմխիթար վիճակում: Վթարային իրավիճակում է գտնվում նաև ՀՀ Ազգային ժողովի շենքի ջեռուցման համակարգը, որը 2016-2017թթ-ի ձմռան ամիսներին խոչընդոտել է աշխատակազմի բնականոն գործընթացը: Նախատեսվում է` 31 միլիոնի շրջանակներում իրականացնել ՀՀ Ազգային ժողովի մասնաշենքում գտնվող ՀՀ պետական պահպանության ծառայության զորանոցի դռների, պատուհանների, պատուհանագոգերի, փականների փոփոխում և տեղադրում, զորանոցի երկու հարկերի առանձին կաթսաներով ջեռուցման սարքի տեղադրում, պատերի երեսապատման, ներկման աշխատանքներ, Էլեկտրահաղորդալարերի առանձին հատվածների և էլեկտրասարքերի փոխում: 22 միլոնով իրականացնել ՀՀ Ազգային ժողովի ընդհանուր կաթսայատան, մայուղու գծերի և ջերմային հանգույցների, վարչական շենքի և նոր մասնաշենքերի, վարչական շենքի կցակառույցի ջեռուցման համակարգերի մասնակի նորոգում: Նախագծի ընդունմամբ ակնկալվում է ունենալ ՀՀ պետական պահպանության ծառայության վերանորոգված զորանոց և ՀՀ Ազգային ժողովի վարչական շենքի, մասնաշենքերի և կաթսայատան անխափան գործող ջեռուցման համակարգ: