ՀՀ դատարանը ճանաչեց Հրաչյա Հարությունյանի գործով ՌԴ դատավճիռը (տեսանյութ)
ՌԴ-ից մոտ մեկ ամիս առաջ Հայաստան տեղափոխված հայ վարորդ Հրաչյա Հարությունյանը դատարանում է: Հիշեցնենք, 2013 թվականի հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղեւորատար ավտոբուսին, ինչի հետեւանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ ստացել: 4 տարի Ռուսաստանի Դաշնությունում իր պատիժը կրելուց հետո նրան արտահանձնել են: Նա ՌԴ-ում առողջական խնդիրներ է ունեցել, սակայն հրաժարվել է վիրահատության ենթարկվել: Իսկ Հայաստանում արդեն վիճակը լավ է: Նա ՌԴ քրեակատարողական հիմնարկում պարբերաբար պատժախուց է տեղափոխվել: «Իբրեւ թե ճաշարան չեմ գնացել, բայց այդպես չէ»,- դատարանում հայտարարեց Հրաչյա Հարությունյանը՝ անդրադառնալով իր պատժին: Այսօր դատարանում քննվում էր Արդարադատության նախարարության քրեակատարողական վարչության միջնորդությունը՝ ՌԴ Մոսկվայի Տրոիցկի շրջանի դատարանի դատավճիռը Հրաչյա Հարությունյանի մասով ճանաչելու վերաբերյալ: Հրաչյա Հարությունյանն առանց պաշտպանի էր մասնակցում նիստին։ Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Աննա Դանիբեկյանը մոտ 1 ժամ խորհրդակցական սենյակում մնալուց հետո որոշեց բավարարել միջնորդությունը եւ ճանաչել դատավճիռը՝ ազատազրկումը 6 տարի 9 ամիս ժամկետով: «Մեզ համար ինքը հանցագործ չի, մարդասպան չի,դիտավորյալ չի եղել, միամիտ է ստացվել, մեքենան անսարք է եղել: Մի կողմից նայում ես անմեղ է, բայց մի կողմից էլ զոհ եղել է 18 հոգի»,- ասաց Հրաչյա Հարությունյանի կինը՝ Անահիտ Մարտիրոսյանը: Կինը պատմում է՝ տեսակցության ժամանակ Հրաչյա Հարությունյանը ազատազրկման վայրի պայմաններից համարյա բան չի պատմել: «Ուղղակի թոռնիկին էր կարոտել,անընդհատ գրկում էր, սիրում, ասում էր, շատ է մեծացել, շատ է փոխվել: 4 տարուց ավելի չէր տեսել թոռնիկին»,- պատմում է Անահիտ Մարտիրոսյանը։ Հրաչյա Հարությունյանի հարազատները հույս ունեն, որ Հայաստանում անհրաժեշտ բոլոր վիրահատությունները կարվեն:
