A
A
Ամենատարածված անարդար տուգանքները, որ կարող եք բողոքարկել. ԻՔՄ (տեսանյութ)
Ճանապարհային ոստիկանությունը տարեկան դուրս է գրում միլիոնից ավելի տուգանքներ։ Այդ տուգանքների մի մասը տեղին է, իսկ մի մասը՝ ոչ։ Ցանկացած մարդ կարող է բողոքարկել իր նկատմամբ կայացված որոշումը, եթե համարում է, որ այն ապօրինի է։ Տեսանյութում ներկայացված են ամենատարածված անարդար տուգանքները, որոնց բողոքները հիմնականում բավարարվում են։ Բողոքարկման ձևերը կգտնեք http://tuganq.am/ կայքում։
- Փողոցների տեղային լայնացումներում՝ այսպես կոչված գրպանիկում թեք, երթևեկելի մասին ոչ զուգահեռ կայանված և տուգանված վարորդները կարող են վստահ բողոքարկել դատական կարգով և հասնել հաջողության, եթե չի եղել նշան, որը վարորդներին կպարտադրեր կանգնել զուգահեռ:
- Հայաստանում լրացուցիչ սեկցիայով լուսացույցերը հաճախ այնպես են կահավորված, որ ընկալելի չեն: Հաճախ լուսացույցը կանաչ գույնն է վառում և մարած սեկցիան չնկատող վարորդները մտնում են խաչմերուկ՝ խախտում կատարելով: Լուսացույցի լրացուցիչ սեկցիային չենթարկվելու տուգանքները վարորդները կարող են վստահաբար բողոքարկել, քանի որ լուսացույցի արգելող նշանը պետք է լինի կարմիր գույնի և ոչ պարզապես մարված կանաչը:
- Վարորդները կարող են նաև վստահաբար բողոքարկել կարմիր լույսին չենթարկվելու տուգանքները, եթե լուսացույցը բավարար տեսանելի չէ: Վարորդը պարտավոր չէ տեսնել չերևացող, խամրած և տեսանելիության այլ ստանդարտներին չբավարարող լուսացույցը:
- Դատարանները նաև հաճախ բավարարում են այն բողոքները, որոնք կապված են ֆորմալ առումով բնակավայրերի, բայց իրականում ամայի ու չբնակեցված տարածքում արագության սահմանափակման խախտաման հետ, քանի որ բնակավայրը դա ոչ թե բնակավայրի նշանն է, այլ դրա հատկանիշները՝ օրինակ, շենք-շինությունները:
