Բակո Սահակյանը խիստ և դաժան է Արցախին վնասողների նկատմամբ. սոցիոլոգ (տեսանյութ)
Արցախի համար նախագահական համակարգն ավելի արդյունավետ է. ասում է սոցիոլոգ Ահարոն Ադիբեկյանը՝ գնահատելով Արցախում նախագահական ընտրություններին առաջադրված թեկնածուների հնարավորությունները: Ըստ սոցիոլոգի, սահմանադրության հանրաքվեի շրջանակներում քաղաքացիներին հարց են ուղղել, թե ում կցանկանան տեսնել նախագահի պաշտոնում՝ 76 տոկոսն իր ձայնը տվել է Բակո Սահակյանին, իսկ 12,5 տոկոսը՝ Վիտալի Բալասանյանին: Ահարոն Ադիբեկյանը ներկայացրեց, թե ինչ առաջընթաց է ապահովել Բակո Սահակյանը նախագահության տասը տարիների ընթացքում. «Եթե մինչ 2017 թվականը Արցախի բնակչությունը կրճատվում էր, ապա նրա նախագահության օրոք տասնմեկ հազարով աճել է, ՀՆԱ-ն՝ 71 մլրդ դրամից հասնել է 230 միլիարդի, այսինքն` երեք անգամ աճել է, կրճատվել է նաեւ գործազրկության թիվը՝ կազմելով 11 տոկոս»: Նման տպավորիչ արդյունքներով Բակո Սահակյանը ոչ թե իրավունք ունի, այլ ավելի ընկալելի նախագահ է, ժողովրդավար է, տիրություն է անում բնակչությանը և բավական ապահովված է բանակը, նշում է Ադիբեկյանը. «Բակո Սահակյանի ընտրությունը բավականին հիմնավոր և ընկալելի, ընդունելի է ժողովրդի կողմից: Նա շահավետ, օգտակար աշխատանք է կատարում եւ վայելում է մեծ հեղինակություն ոչ միայն որպես ղեկավար, այլ որպես մարդ: Նա բավականին խիստ և դաժան է այն մարդկանց նկատմամբ, ովքեր վնասում են Արցախին կամ խանգարում»: Անդրադառնալով Բակո Սահակյանի մրցակից՝ «Շարժում-88» խմբակցության ղեկավար Էդուարդ Աղաբեկյանի թեկնածությանը, Ահարոն Ադիբեկյանն ասաց, որ շարժումը զգալի ընդդիմադիր ուժ է համարվում: «էդուարդ Աղաբեկյանը բավականին երիտասարդ է, կարող է իրեն այնպես դրսևորել, որ հաջորդ ընտրություններում նրա թեկնածությունն ընկալելի լինի»,-ասաց նա: Ահարոն Ադիբեկյանը «Վերածնունդ» կուսակցության ղեկավար Հայկ Խանումյանին կոչ արեց ավելի համեստ լինել , քանի որ նա խորհրդարանում մեկ ձայն ունի եւ այն, ըստ էության որոշիչ չէ: Խորհրդանում այսօր 33-ից 28 տեղը, այսինքն՝ 85 տոկոսը, ձայնը կտան Բակո Սահակյանին, իսկ մյուս ընդդիմադիր թեկնածուի օգտին կքվեարկի 9-12 տոկոսը՝ վստահ է Ահարոն Ադիբեկյանը:
