Արայիկ Խանդոյան. «Մենք կանգուն ենք մեր լեռների պես» (տեսանյութ)
Սասնա ծռեր խմբի անդամ Արայիկ Խանդոյանն այսօր դատարանում հայտարարեց. «Մենք կանգուն ենք մեր լեռների պես, իմ մասին չանհանգստանաք»:
Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում այսօր բողոքարկվում էր Արայիկ Խանդոյանի տեսակցությունների ու հեռախոսային խոսակցությունների վրա դրված արգելանքը վերացնելու մասին հարցը: Պաշտպան Արա Ղարագյոզյանը դատարանին տեղեկացրեց, որ Արայիկ Խանդոյանի գործով նախաքննությունն արդեն ավարտվել է, եւ հարազատների հետ հանդիպումները որեւէ ձեւով չեն կարող խոչընդոտել գործի ընթացքին:
Այս գործով քննչական խմբի ղեկավար Էդիկ Հակոբյանը հայտարարեց, որ իրենց որոշումը Գլխավոր դատախազին չի բողոքարկվել, ուստի բողոքը պետք է մերժել:
Ի դեպ, այսօր դատավոր Աննա Մաթեւոսյանը մեղադրյալ Արայիկ Խանդոյանից հետաքրքրվեց, թե արդյոք նա ինքնաբացարկ ունի՞ հայտնելու դատավորին: «Ես ստրուկի ստրուկին ոնց ասեմ՝ ես բացարկ եմ հայտնում»,- ասաց Արայիկ Խանդոյանը:
Այս պահին դատարանը հեռացել է խորհրդակցական սենյակ՝ որոշում կայացնելու:
