Հայաստանի տնտեսությունը էներգատար է (տեսանյութ)
Հայաստանի տնտեսությունը համարվում է էներգատար: Էներգախնայողության մասին դեռ վաղ է խոսել, չնայած իրականացվում են որոշ փոփոխություններ։ «ԽՍՀՄ նախկին պետությունների հետ համեմատ մենք հաստատ վերջին տեղում չենք, ոչ էլ մեջտեղում ենք, մենք առաջին տեղերում ենք: 4 տարվա կտրվածքով՝ էներգախնայողությունը կազմել է 8,8 տոկոս»,- ասում է ՀԷԵԲՊ նախարարության Վերականգնվող էներգետիկայի եւ էներգախնայողության վարչության պետ Հայկ Բադալյանը: Հայաստանի վերականգնվող էներգիայի եւ Էներգախնայողության հիմնադրամը գործում է 2012 թվականից: Ֆինանսավորելով ու աջակցելով տարբեր կառույցների, հիմնադրամն այսօր հասել է զգալի արդյունքների: «Մոտավորապես 184 շենք եւ համայնքային լուսավորության համակարգեր բարելավվել են այս ծրագրի շրջանակներում՝ ապահովելով 51 տոկոս էներգախնայողություն: Միջինը 51 տոկոս է կազմում էներգախնայողությունը»,- նշում է ՀՎԷԷ հիմնադրամի տնօրեն Թամարա Բաբայանը: Այս տարի մեկնարկել է նաեւ ՓՄՁ-ներին աջակցման ծրագիրը: Մասնագետներն ուրախությամբ են նշում՝ գործարարները սկսել են հասկանալ, որ շուկայում աճելու եւ զարգանալու գրավականներից մեկը էներգախնայողությունն է։ Հիմնադրամը 400-ից ավել դիմում է ստացել՝ էներգախնայման ծրագրին միանալու համար։ Հաջորդ քայլով նրանք պատրաստվում են ծրագիր մշակել համայնքների համար: Այսպես կխնայվի ոչ միայն անհատի, այլ նաեւ պետական բյուջեի գումարները: Մանրամասները՝ տեսանյութում
