«Շատ սիրուն չպատասխանեցիք. 75 մլրդ բերում եք Երեւան, հետո նորից՝ տանում» (տեսանյութ)
Կառավարության հրավիրած ԱԺ արտահերթ նիստին այսօր Տարածքային կառավարման եւ զարգացման նախարարի առաջին տեղակալ Վաչե Տերտերյանը ներկայացրեց «Համայնքների ֆինանսական համահարթեցման մասին» հարցը: Փոխնախարարի խոսքով՝ այս նախագծի շնորհիվ դոտացիաների ներդաշնակ ու համաչափ բաշխում է իրականացվում համայնքների միջեւ. «Տասը տարվա ընթացքում այս գործընթացը հնարավոր է եղել իրականացնել սահուն, կանխատեսելի գործընթաց, որեւէ դժվարություն չի նկատվել: Այս համակարգի հիմքում պարզ սկզբունք է՝ դոտացիաները բաշխվել են ըստ եկամուտների՝ մեկ շնչին ընկնող, ըստ բնակչության թվաքանակի: Առաջակում ենք նաեւ նոր լուծումներ՝ համայնքները տարբերակել, իդենտիֆիկացնել, քանի որ վերոնշյալ երկու գործոնը ամբողջովին չի ներկայացնում համայնքների առանձնահատկությունները, հատկապես նրանց ծախսերի հետ կապված անհրաժեշտությունները: Դրա համար այս նախագիծն ենք բերել, որով դոտացիաների հաշվարկման բազմագործոն համակարգ ենք առաջարկում»: ՀԱԿ խմբակցության անդամ Հրանտ Բագրատյանը, հարց ուղղելով նրան, ասաց, որ այս նախագիծը հակասում է Սահմանադրությանը. «Սահմանադրությունը չի ասում, որ համայնքներին հողի ու գույքի հարկը պետք է դուք ամրագրեք, այդ դուք եք բյուջեով գրում: Համայնքների բյուջեի ֆինանսական ռեսուրսները կազմում են 25 տոկոս, մնացածը բերում են Երեւանից՝ դոտացիաների տեսքով: Միգուցե հակառա՞կն անեիք ու Երեւանից քիչ ստանային: Այս օրենքը ամբողջովին խառնաշփոթ է. դուք խրախուսում եք ներքին արտագաղթը՝ համայնքը պետք է մտածեր իր անդամներին իր մոտ պահելու մասին: Դուք չեք բերում օրենք, որ բնակչին համայնքը պահի իր մոտ: Կներեք, սա, իմ խորին համոզմամբ, խիստ հակասում է Սահմանադրությանը: Ապացուցեք ինձ հակառակը, դուք գցում եք մեզ երկմտության մեջ»: Վաչե Տերտերյանը հայտարարեց, որ ոչ մի հակասություն չկա. «Համայնքների բյուջեները ոչ մի կերպ համադրելի չեն ՀՀ պետական բյուջեից ստանալիք գումարների հետ: Նման խնդիրն ունենք, մենք բազմիցս ենք այդ մասին հայտարարել: Իսկ այս նախագիծը վերաբերում է այսօր բյուջեից տրամադրվող ֆինանսական ռեսուրսներին, որոնք համահարթեցման ձեւով տրամադրվող գումարներին է վերաբերում»: Հրանտ Բագրատյանին չբավարարեցին նրա պատասխանները. «Շատ սիրուն չպատասխանեցիք հարցին՝ 75 մլրդ դրամ բերում եք Երեւան հետո՝ տանում նորից համայնք: Շահութահարկի տասը-քսան տոկոսը թողեք համայնքին: Ասում եք՝ հնարավորություն չկա՝ մեզնից չի՞ դա կախված, նույն փողն է: Խոշորացումից հետո, որին ես դեմ եմ եղել միշտ, համահարթեցման խնդիրը ուժեղացել է»: Վաչե Տերտերյանը նախ նշեց, որ համայնքների խոշորացմանը միշտ կողմ է եղել, քանի որ կառավարման տեսանկյունից արդյունք է բերում, իսկ համահարթեցման արդյունքում խնդիրը թուլանում է: