«Ինչքանով կկատարեմ վերեւի հրահանգները, կպարզվի աշխատանքում»
«Հեռուստառադիոպետկոմ»-ի եւ «Արմենպրես» գործակալության նախկին նախագահ ու տնօրեն, «Հայք» թերթի խմբագիր, քաղաքական-հասարակական գործիչ Տիգրան Հակոբյանն ինքնառաջադրվել է Հեռուստատեսության եւ ռադիոյի ազգային հանձնաժողովի անդամի թափուր տեղի համար: «Ես տեսա, որ մրցույթ է հայտարարվել, մասնակցել եմ, օգոստոսի 22-ին առաջին փուլն անցել եմ, մասնագիտացված հանձնաժողովի անդամները կողմ են քվեարկել, այնտեղ թեստավորում էր՝ հարց ու պատասխան էր եւ այլն: Մասնագիտական հանձնաժողովի դրական եզրակացությամբ իմ թեկնածությունը պետք է մտնի ԱԺ օրակարգ, եւ պատգամավորները պետք է որոշեն, թե ես ինչքանով եմ համապատասխանում այդ գործին»,- «Ա1+»-ին ասաց Տիգրան Հակոբյանը: Դիտարկմանը, որ հանձնաժողովը հիմնականում կատարում է վերեւից եկած հրահանգները, քաղաքական գործիչը պատասխանեց, որ իր բոլոր քայլերը հստակ գիտակցելով է անում. «Հիմա ինչքանով ես կկատարեմ վերեւից եկած հրահանգները կամ չեմ կատարի, կպարզվի իմ աշխատանքում, առաջ չընկնենք»: Միաժամանակ Տիգրան Հակոբյանը խորհուրդ է տալիս մի փոքր սպասել. «Աստված տա կամ Աստված չտա, եթե ընտրվեմ հանձնաժողովի անդամ , մյուս բոլոր հարցերին այն ժամանակ կկարողանամ պատասխանել՝ շատ ավելի ինֆորմացիա ունենալով՝ ի՞նչ հրահանգներ են իջեցվում, կատարո՞ւմ եմ, թե՞ չեմ կատարում»,- եզրափակեց Տիգրան Հակոբյանը։ Ի դեպ, նա հանձնաժողովի անդամի միակ թեկնածուն է եղել: Իսկ թափուր տեղն առաջացել էր ՀՌԱՀ անդամ Արամ Մելքոնյանի պաշտոնավարման ժամկետը լրանալուց հետո։
