Ձերբակալվածի երեխան հարցնում է, թե ո՞ւր է հայրը (տեսանյութ)
Հիմնադիր խորհրդարանի անդամ Արմեն Միքայելյանը կմնա ձերբակալված: Մալաթիա Սեբաստիա վարչական շրջանների ընդհանուր իրավասության դատարանն այսօր օրինական է համարել նախաքննական մարմնի որոշումը: Արմեն Միքայելյանի կինը շարունակում է պնդել՝ նրան ձերբակալելու հիմքեր ընդհանրապես չկային: «Ծնողներին ճանապարհում էինք տուն, դալանով մտանք ներս, երկու մեքենա սեւ ապակիներով եկան, մեր դիմացը շատ արագ կանգնեցին: 8-ից 10 հոգով դուրս եկան, բիրտ ուժ կիրառելը շատ մեղմ է ասելը, սարսափելի կոպիտ ձեւով խլեցին, գողացան ու մի մեքենայով արագ տարան: Քաղաքացիական շորերով անձինք ի՞նչ իրավունք ունեն այդ ձեւով մարդուն գողանան»,- «Ա1+»-ին պատմեց Լիանա Եդիգարյանը: Դեպքը տեղի է ունեցել հուլիսի 27-ին, երբ նրանք վերադառնում էին Խորենացի փողոցից: Հաջորդը օրը Լիանան կարողացել է Ձերբակալվածների պահման վայրում տեսնել ամուսնուն: «Ասեց, մեքենայի մեջ ձեռնաշղթաներ են հագցրել եւ մոտը զենք են գցել: Սարսափելի է, մարդու վրա գործ են ուզում հարուցել»: Ըստ ոստիկանության՝ Արմեն Միքայելյանը բերման է ենթարկվել ապօրինի կերպով զենք և ռազմամթերք պահելու, կրելու կասկածանքով: Խուզարկությամբ հայտնաբերվել է թմբուկավոր ինքնաշեն ատրճանակ` լիցքավորված 7 փամփուշտով: Մասնագիտությամբ ծրագրավորող Արմեն Միքայելյանը երեք անչափահաս երեխաներ ունի: Նրա 7 տարեկան տղան անընդհատ հարցնում է, թե ուր է հայրը: «Փորձում ենք բացատրել: Անընդհատ տեսնում է ոստիկանների այդ բռնի ուժը, ասում է էլի բռնեցին, էլի պապայիս»,- ավելացնում է Լիանա Եդիգարյանը: Վաղը լրանում է Հիմնադիր խորհրդարանի անդամի ձերբակալման 72 ժամը: Դրանից հետո պարզ կլինի, նախաքննական մարմինը կդիմի՞ դատարան ՝ խափանման միջոցը ընտրելու վերաբերյալ, թե՝ ոչ:
