«Թույլ մի տվեք երեխաներին լողալ արհեստական լողավազաններում»
Երևանի քաղաքապետարանում տեղի ունեցած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, աշխատակազմի հանրակրթության վարչության պետը զեկուցել է, որ հունիսի 1-ից մեկնարկած «Երևանյան ամառ 2016» միջոցառումների եռամսյա ծրագրով վարչական բոլոր շրջաններում կազմակերպվում են տարբեր միջոցառումներ, որոնց անմիջական մասնակիցն են դառնում նաև կարիքավոր ընտանիքների և հատուկ խմբերի երեխաները: Քաղաքապետը հանձնարարել է շարունակել ծրագրով նախանշված միջոցառումների կազմակերպման ուղղությամբ վերահսկողությունն ու դրանց պատշաճ իրականացումը: Հաշվի առնելով երեխաների և պատանիների կողմից, ամռան շոգ եղանակով պայմանավորված, արհեստական ջրավազաններում հաճախակի նկատվող լողալու դեպքերը, քաղաքապետ Տարոն Մարգարյանը առողջապահության վարչությանը և համապատասխան բոլոր ստորաբաժանումներին հանձնարարել է խիստ վերահսկողության տակ առնել վերոնշյալ տարածքները՝ տեսանելի վայրերում տեղադրելով դրանցում լողալն արգելող ցուցանակներ, նաև իրազեկել դրանցում լողալու հնարավոր վտանգների մասին: «Հատկապես երեխաներն ու պատանիները ամռան այս շոգ օրերին օգտվում են արհեստական ջրավազաններից, ինչը կարող է վտանգել նրանց առողջությունը: Վարդավառի տոնին, անշուշտ, մեր կողմից որոշակի բացառություններ արվում են, և երեխաներին թույլատրվում է լողալ չնախատեսված լողավազաններում: Բայց այդ ժամանակ հատուկ նախապատրաստական աշխատանք է տարվում ու տարածքը հարմարեցվում է տոնական միջավայրին: Բայց մնացած բոլոր դեպքերում դա վտանգավոր է: Այդ ջրավազանների ջուրը, ինչպես նաև կառուցվածքը, նախատեսված չէ լողալու համար, ինչի մասին պետք է պարբերաբար իրազեկել ու բացատրական աշխատանքներ տանել հատկապես ծնողների շրջանում՝ հորդորելով թույլ չտալ իրենց երեխաներին լողալ արհեստական լողավազաններում», - ընդգծել է քաղաքապետ Տարոն Մարգարյանը Խորհրդակցության շրջանակում բնապահպանության վարչության պետը զեկուցել է, որ մայրաքաղաքում շարունակվում են կանաչապատման, այգիների մաքրման և ծաղկային տարածքների ընդլայնման ուղղությամբ տարվող աշխատանքները: Ըստ ժամանակացույցի շարունակվում են չորացած և ընկնելու վտանգ ներկայացնող ծառերի նկատմամբ մասնագիտական միջամտությունները, ինչպես նաև ծառերի և թփերի բուժման աշխատանքները: Բացի այդ, զեկուցվել է, որ ոռոգման ցանցի անխափան աշխատանքի կազմակերպման ուղղությամբ ևս իրականացվում է մշտական հսկողություն: Այս համատեքստում նշվել է, որ ջրի ճնշման խնդրով պայմանավորված ոռոգում չի իրականացվում Սարալանջի հին և նոր փողոցների միջև գտնվող տարածքում: Քաղաքապետը հանձնարարել է կարճ ժամանակում լուծել խնդիրն ու ապահովել նաև տվյալ տարածքի լիարժեք ոռոգումը: Երևանի քաղաքապետարանի տեղեկատվության և հասարակայնության հետ կապերի վարչություն
