Սոցփաթեթի կանխիկացումն ամբողջությամբ արգելված չէ. Ա. Մինասյան (տեսանյութ)
Այսօր կառավարության նիստի վերջում Էկոնոմիկայի նախարար Արծվիկ Մինասյանը ձայնի իրավունք խնդրեց՝ անդրադառնալու համար նիստի սկզբում Վերահսկիչ պալատի նախագահ Իշխան Զաքարյանի հայտարարությանը: Արծվիկ Մինասյանի կարծիքով՝ Իշխան Զաքարյանի նշած՝ սոցփաթեթների ապօրինի կանխիկացում արտահայտությունը տեղին չէ. «Որովհետեւ արգելված չէ դրա կանխիկացումը: Սահմանափակումներ կան, բայց արգելված չէ, հետևաբար մենք պետք է խոսենք հասցեականության բարձրացման և արդյունավետությունն առաջ տանելու մասին, որ քաղաքացիների մոտ տպավորություն չստեղծվի, որ հանվում է այդ բաղադրիչը»: Վարչապետ Հովիկ Աբրահամյանն արձագանքեց ու եւս մեկ անգամ հիշեցրեց, որ խոսք չի գնում սոցփաթեթներն ամբողջությամբ հանելու մասին. «Երեւի եւս մեկ անգամ հստակեցնեմ՝սոցիալական փաթեթը 2016 թվականի համար գործում է հստակ, ոնց որ նախատեսված է պետական բյուջեով: 2017-2019 թվականի միջնաժամկետ քննարկումների ընթացքում նախագծում դա կասեցրել ենք, և այդ հանձնարարությունը, որը տրվել է երեք նախարարություններին, պետք է ներկայացնենք նոր գործիքակազմ՝ ավելի հստակ վերահսկելու այդ գործընթացը, իսկ 2017 թվականի բյուջեում մենք ընդգրկելու ենք այդ բաղադրիչը»: Վարչապետը նաեւ բացատրեց Արծվիկ Մինասյանին, թե ինչ նկատի ուներ Իշխան Զաքարյանը՝ խոսելով կանխիկացման մասին. «Ինչ վերաբերում է կանխիկին և ոչ կանխիկին, Զաքարյան Իշխանը նկատի ուներ այն պայմանավորվածությունները, որոնք քաղաքացիները ձեռք են բերում առողջարանների հետ, գումարը փոխանցում են և գումարի մի մասը կորցնում են, իսկ մի մասը՝ կանխիկացնում: Սա է խնդիրը: Դրա համար սա պիտի քննարկվի»,- ասաց Աբրահամյանը: Իսկ ՎՊ նախագահ Իշխան Զաքարյանը պարզաբանեց, որ ապօրինի կանխիկացում արտահայտությունը վերաբերում է այն տուր-օպերատորներին, որոնք պետական բյուջեից ստացել են գումարները, սակայն մինչև վերջ տեղ չեն հասցրել, կանխիկացրել են եւ օգտագործել այլ նպատակներով:
