Առաքել Մովսիսյանը պատարագ է լսում (տեսանյութ)
Այս պահին Սուրբ Էջմիածնում Սուրբ Լուսավորչի խորանի մոտ Հռոմի պապ Ֆրանցիսկոս 1-ինը եւ Գարեգին Բ-ն համատեղ պատարագ են մատուցում: Մինչ այդ պատարագից շուրջ երկու ժամ առաջ փակ էին Էջմիածին տանող գրեթե բոլոր ճանապարհները: Արարողությանը հետեւելու համար թույլատրվել էր ներկա գտնվել միայն հրավիրատոմսերով: Այստեղ են Սերժ Սարգսյանը՝ տիկնոջ, վարչապետը, Աժ նախագահը, պատգամավորներ, հասարակական, քաղաքական եւ մշակութային գործիչներ:
Էջմիածնում է նաեւ ԼՂՀ ԱԺ նախագահ Աշոտ Ղուլյանը։ Նա լրագրողների հետ զրույցում նշեց, որ խաղաղության մասին Հռոմի պապի ուղերձները շատ կարեւոր են մեր տարածաշրջանի համար եւ դա հատկապես պետք է գիտակցի մեր հարեւանը:
Այստեղ էր նաեւ, «Հանրապետություն» կուսակցության նախագահ Արամ Սարգսյանը եւ նա հիմնական շեշտադրումն արեց Հռոմի պապի կողմից արտաբերած Հայոց ցեղասպանություն եզրույթի վրա՝ նշելով, որ անպայման, այն մեծ ազդեցություն է ունենալու աշխարհի վրա եւ դրան կհետեւեն նոր ճանաչումներ: Իսկ խաղաղության վերաբերյալ Հռոմի պապի ուղերձները, ըստ նրա, առաջին հերթին պետք է գիտակցեն մեր իշխանությունները:
Պատարագին էր մասնակցում նաև սիրված կոմպոզիտոր Տիգրան Մանսուրյանը: Ըստ նրա՝ այս օրերին Հայաստանում կարեւոր իրադարձություն է տեղի ունենում, որը եւ հպարտության զգացողություն է առաջացնում եւ թույլ տալիս հետեւություններ անել:
Պատարագը լսելու էր եկել նաեւ ԱԺ հանրապետական պատգամավոր Առաքել Մովսիսյանը:
