Գողթ համայնքի բնակիչները փակել են ճանապարհը. ակցիա (տեսանյութ)
Կոտայքի մարզի Գողթ համայնքի բնակիչներն այսօր առավոտվանից փակել են գյուղի ճանապարհը. նրանք պահանջում են չեղյալ հայտարարել Գեղարդալճի ինքնահոս ոռոգման համակարգի ծրագիրը։ Ծրագիրն իրագործելու համար Գեղարդալճի ջուրը պետք է ուղղվի Կոտայքի մարզի որոշ համայնքներ։ Գողթ համայնքի բնակիչ Վահրամ Սեդրակյանը «Ա1+»-ի հետ զրույցում նշեց, որ երբ մայիսի 21-ին վարչապետը գնացել էր Գառնի, իրենք ևս միացել էին այդ ակցիային, սակայն վարչապետը նրանց տեղեկացրել էր, որ այդ ծրագրից ինքը տեղյակ չէ, իսկ մարզպետ Կարապետ Գուլոյանը խոստացել էր դադարեցնել շինարարական աշխատանքները և քննարկումներ կազմակերպել։ «Մինչև հիմա որևէ քննարկում չի կազմակերպվել և համայնքն այլևս ոչ մի խոստման չի հավատում։ Մենք պահանջում ենք, որպեսզի տեխնիկան իջեցվի սարերից և չեղարկվի ծրագիրը»,- նշեց բնակիչը։։ Այս պահին ակցիան շարունակվում է, բնակիչները պաշտոնյաների պատասխանին են սպասում։
